(AFP) – Ex-lider di Venezuela, Nicolas Maduro a bisa riba rednan social ayera cu e ta “para firme” mientras ta posa pa potret for di e prison na New York unda e ta cera desde su captura na man di forsanan Mericano.

Maduro y su esposa, Cilia Flores a keda captura na Caracas durante un operacion militar Mericano na januari. Nan ta deteni na Brooklyn, New York acusa di traficacion di droga y posesion di arma, cargonan cu nan ta rechasa.

“Mi ta manda e potretnan aki como un regalo chikito na tur mi nieto y nieta, na muchanan, y na tur e hendenan noble cu ta stima nos,” el a skirbi riba X. “Mi kier pa boso sa cu nos ta para firme, cu curason yen di e amor di boso, e amor cu ta yega nos converti den oracion, den accion permanente, den solidaridadd y den apoyo berdadero. Infinito danki pa cada palabra, cada gesto, pa cada bendicion,” el a agrega.

Den e dos potret, Maduro ta bisti paña shinishi haciendo señal di paz cu su man. E ta parce di a baha peso considerablemente desde su captura.

Maske e potretnan a aparece diadomingo, datonan di camara ta indica cu a saca nan dia 25 di juni, un dia despues cu dos temblor a mata mas di 6.500 persona y a causa destruccion den nort di Venezuela.

“Nos ta bay keda fuerte, trankil y confia: Dios ta cu nos. Dios ta bay provee. Venezuela ta bay renace,” el a conclui.

E mensahe a yega dos dia despues cu su sucesor, presidente interino Delcy Rodriguez, a anuncia un acuerdo “historico” di petroleo permitiendo Merca opera campo di petroleo na Venezuela.

Rodriguez ta gobernando bao presion intenso di Washington y ta bisa cu el a “scoge e caminda di diplomacia” cu Merca pasobra e kier pa Venezuela bira un poder den energia.

Maduro no tin acceso na corant ni internet di e prison, pero e ta permiti pa papia riba telefon cu famia y abogado aproximadamente 300 minuut pa luna, cu un maximo di 15 minuut pa cada yamada, segun un fuente cercano na e ex-lider.

Su yiu, Nicolas Maduro Guerra, ta bisa cu e ta den bon condicion y ta pasa su dia ta studia Bijbel.

Huicio di Maduro y su esposa na Merca ta bay cuminsa dia 1 di juni 2027, un corte federal na New York a anuncia fin di juli.