Ayera atardi polis mester a acudi na un rotonde pa motibo cu operadornan di Tour y diferente trahador a blokia e rotonde como protesta contra e proposicion di gobierno, cual a presenta como un solucion pa asina por sigui cu dialogo tocante e problematica andando pa cu ceramento di camindanan, un topico anteriormente cubri ampliamente pa Bon Dia Aruba.
Segun e splicacion cu a duna, e blokeo a surgi pa motibo cu tin disgusto cu e hecho cu gobierno kier prohibi full off-road. “Nos no t’ey solamente pa tour guidenan, nos t’ey como Aruba paso nos Rubianonan, esaki ta parti di nos cultura, poco poco nos ta perdiendo mas di nos cultura. Awo si nos perde esaki tambe, ki nos Rubianonan ta haci, e piscadornan, e surfernan, con nan ta bay yega ayatras?” un representante a declara.
Gobierno anteriormente a comunica cu a trece proposicion alternativo unda tour operatornan por sigui haci nan trabao y ambos banda lo sali gana. Ora a menciona esaki, a contesta cu “gobierno ta papia tur nechi. Pasobra nos a pidi respet, nos no a haya. Awo, un dia prome cu esaki ta pasando nan a sali bisa cu nan kier papia pero tur e lunanan aki nan no kier a papia y ultimo afspraak a cancela na ultimo momento. Y corda bon, akinan bo ta deal cu hopi tata y mama di famia cu ta bay perde nan pan. Y atrobe nos ta bisa, nos no ta bezig ta offroad, nos ta bezig ta core riba caminda di santo cu ta traha y dos biaha pa aña DOW ta pasa y rosa caminda haciele fine pa nos por core. Awo un voorbeeld, Ronde van aruba ta pasa eydennan, awo ki ta bay pasa, ta bay cancela Ronde van Aruba tambe? Pa shoco?”
Pa cu ceramento di e rotonde como protesta a bisa cu esaki ta solamente e comienso, “pasobra nos intencion no ta pa haci nada bay fo’i man pero atrobe, awe loke ta pasando aworaki no ta supposed di pasa mes pero nos ta disgusta cu nan ta sugarcoat nos cu algo y e realidad ta full otro. Y nos no ta bay acepta e cosnan ki.”
