(Infobae) – Husticia di Ecuador a ordena detencion di ex-presidente Abdala Bucaram Ortiz ora e ser saca di cuido medico, despues cu su ausencia pa di seis biaha a impedi tribunal anuncia decision den e caso relaciona cu supuesto comercialisacion iregular di testnan di COVID-19 durante pandemia.

E medida a ser adopta anochi di 3 di september door di Tribunal di Garantianan Penal encarga cu e caso. Huesnan tambe a ordena Bloc di Buskeda di Polis Nacional pa mantene vigilancia permanente na e clinica na Guayaquil unda, segun famia y abogadonan di ex-presidente, e ta hospitalisa despues di un operacion na su curason.

E orden di detencion no ta un condena y tampoco no ta nifica cu Bucaram a ser declara culpabel. Su meta ta pa garantisa cu e presenta na corte pa tende e decision di prome instancia.

Te 4 di september, no tabatin confirmacion oficial cu Bucaram a sali for di clinica ni cu polis a ehecuta e orden.

Bucaram, kende a goberna Ecuador entre augustus 1996 y februari 1997, ta ser procesa hunto cu su yiu Jacobo, ciudadano Israeli Oren Sheinman y ex-agente di Agencia Metropolitano di Transito di Quito Leandro Berones.

E cuater ta enfrenta acusacion di crimen organisa y ta mantene nan presuncion di inocencia mientras no tin un sentencia final.

Fiscal Lidia Sarabia a cuestiona e ripiticion di suspencionnan y a pidi pa investiga e circunstancianan cu ta impedi conclusion di e proceso.

Durante e ultimo convocatorianan, agentenan di polis a bay na e centro medico pa verifica presencia y condicion di Bucaram, pero nan a reporta cu nan no a haya e facilidadnan necesario pa confirma su situacion directamente.

Famia di Bucaram ta sostene cu e ex-presidente a pasa pa un operacion di emergencia na su curason dia 26 di augustus. Su casa, Maria Rosa Pulley, a publica potret di e procedemento y a denuncia loke e ta considera persecucion contra Bucaram y su circulo.

Un di su yiunan despues a sigura cu el a entrega na un agente e factura di admision y documentacion clinico pa comproba cu su tata ta hospitalisa.

Caso ta origina for di 2020

E caso ta data for di augustus 2020, ora Ecuador tabata pasando door di un di e periodonan mas critico di emergencia di salud.

Segun Fiscalia, e acusadonan a colabora cu un structura cu a obtene beneficio economico mediante comercialisacion di 21.000 test rapido, mascara, lanceta y otro material medico.

Teoria di Fiscalia ta indica cu e organisacion a usa vehiculo, servidor y recurso di Agencia Metropolitano di Transito pa transporta e mercancia entre diferente provincia.

Algun miembro supuestamente a usa uniform y identificacion falso pa presenta nan mes como miembro di cuerpo diplomatico of di DEA di Merca.

E acusacion ta atribui na Berones y Sheinman participacion directo den e structura. Abdala y Jacobo Bucaram ta identifica como colaboradornan.

Parti di e materialnan lo tabata warda den cas di e ex-presidente na Guayaquil, mientras cu su yiu supuestamente a entrega USD 321.600 cash como pago pa e mercancia.

E ultimo acusacion aki ta ser sostene, entre otro evidencia, pa declaracion di Shy Dahan, un ciudadano Israeli cu a ser mata na augustus 2020 den Penitenciaria del Litoral.

Durante e proceso, Fiscalia a presenta alrededor di 50 testimonio di experto y testigo, ademas di documento, grabacion audiovisual y evidencia recupera for di aparato electronico.