Awe, 7 di September, United Nations ta conmemora Dia Internacional di Aire Limpi pa un Cielo Blauw. Ta un dia dedica na algo cu tur hende mester por considera normal: habri porta di bo cas, hala rosea profundamente y respira aire limpi pa un bon salud y bienestar. Pero pa hopi famia di Simeon Antonio, Kas Paloma, Parkietenbos, Buena Vista y Mahuma, esaki no ta nan realidad.

For di mainta ora nan lanta, habitantenan ta sinti e biento di Aruba cu tabata fresco y limpi y nan ta puntra nan mes: Con e aire lo ta awe? Nos por habri bentana? E muchanan por hunga afo? Nos grandinan por sinta den patio?

Mientras e mal holo di Ser’I Teishi, Barcadera y Dump na Parkietenbos cu ta drenta cas no ta pidi permiso. Durante hopi aña, e barionan aki a keda confronta cu consecuencia di actividadnan di mal maneho di desperdicio den nan cercania sin tene cuenta cu e habitantenan di e barionan.

E dump bieu na Parkietenbos, deramento di sushi na Ser’i Teishi y actividadnan relaciona cu maneho di desperdicio na Barcadera a pone cu mal holo di aire sushi por yega den nan cas y nan ambiente na cualkier momento cu cualkier direccion di biento. Pa e residentenan, esaki no ta solamente un asunto di un holo desagradabel. Ta e calidad di bida y salud di famia; nan muchanan y nan grandinan.

E realidad ta particularmente doloroso pa nos muchanan y nos adultonan mayor. Muchanan nan pulmon ta ainda den desaroyo, mientras cu hopi persona di edad tin condicionnan respiratorio of otro condicionnan cu ta haci nan mas vulnerabel.

Tin famia cu, pa proteha salud y bienestar di nan sernan keri, ta biba separa di nan grandinan. Tin tambe caso reporta di miembro di famia cu mester uza mashin di oxigeno.

Gobierno tin e deber di cuida y proteha su pueblo

Mientras na otro parti di mundo hende ta papia di cielo blauw y importancia di aire limpi, den Simeon Antonio, Kas Paloma, Parkietenbos, Buena Vista y Mahuma tin famianan cu simplemente ta pidi:

“Laga nos hala rosea di aire limpi.”

Nos no ta pidi luho ni trato special. Nos ta pidi e mesun calidad di bida cu tur otro famianan na Aruba ta disfruta di dje. Ta deber di Gobierno cuida y proteha su pueblo.

Ora un situacion ta afecta salud, bienestar y calidad di bida di un comunidad, Gobierno tin responsabilidad di investiga loke ta pasando, coregi loke ta robes y percura pa e problema no sigui causa sufrimento pa e comunidad.

Nos ta pidi pa un mucha por hunga pafo sin cu su mayornan mester preocupa di e aire.

Nos ta pidi pa nos grandinan por sinta den cura di nan cas, halando rosea di aire limpi.

Nos ta pidi pa famianan por habri nan porta y bentana sin miedo di cu un mal holo lo yena nan cas.

Nos ta pidi pa hende cu problema respiratorio por sinti nan mes protegi den nan propio hogar.

Y, riba tur cos, nos ta pidi pa e famianan di Simeon Antonio, Kas Paloma, Parkietenbos, Buena Vista y Mahuma por bolbe biba un bida normal.

Auxilio

Stichting Parkietenbos ta spera cu awe cu ta Dia Internacional di Aire Limpi y Shelo Blauw 2026 no lo pasa como simplemente otro fecha riba calendario. Laga e dia aki marca e momento cu nos pais a scucha e grito di auxilio di e barionan y Gobierno cuminsa cu e trabou necesario pa yuda e habitantenan di e barionan concerni recupera nan derecho di biba y hala rosea normal di aire limpi.