(AFP) – 14 persona a bay huicio na Francia diamars tocante e morto di por lo menos 31 persona den e Canal na 2021, cu e accidente mas mortal involucrando solicitantenan di asilo purbando di yega e costa Ingles.
E huicio ta carga importancia particular pa motibo di e tasa di morto halto y e cantidad di partido civil involucra, 114 en total, incluyendo e famia di e victimanan. Algun di nan a biaha for di Erbil na Irak su region Kurdistan pa testigua.
E 14 homber ta acusa di a hunga un rol den e desaster den cual 27 persona a fayece ora cu nan barco inflabel a hundi dia 24 di november, 2021. 4 otro ta desapareci.
Na apertura di e huicio, solamente 9 acusando tabata presente, un cu a aparece den custodia.
E victimanan, di entre 7 y 46 aña, a inclui 7 hende muhe y dos hoben cu tabata mas tanto Kurdo di Irak pero tambe personanan di Afghanistan, Ethiopia, Egipto y Vietnam. Solamente 2 hende homber a sobrevivi e tragedia.
Dia 24 di november 2021, un barco Frances a reporta cu el a mria varios curpa sin bida ta clota den e canal cerca di Calais, cual ta situa cerca di awa Britanico.
Testimonio di e dos sobreviviente, ken a paga 1.500 y 2.750 euro respectivamente, a yuda investigadornan parcialmente reconstrui e eventonan.
Segun nan, e boto a cuminsa perde aire y guli awa despues di varios ora riba awa.
“Alrededor di 2:30 di maitna, nos a cuminsa saca awa. Pero repentinamente e boto a bolter,” sobreviviente Somali Issa Omar a bisa durante e investigacion, segun testimonio cu a lesa den corte.
“Tur hende a drenta panico. Bo por a scucha yoramento y hende muhe ta grita.”
Pasaheronan a cay y a hoga un tras otro, a pesar di a haci decenas di yamada desespera pa ayudo na servicionan di rescate Britanico.
Omar su abogado, Matthieu Chirez, a bisa cu su cliente “no tabatin e forsa pa ta presente y lo ser scucha si e por haci esey” mas despues. E huicio ta anticipa di dura 3 siman.
Thomas ricard, un di e abogado pa e varios victima su famia, a bisa cu 9 persona a bini for di Erbil pa testigua.
“Esaki ta un paso importante pa nan, algo cu no lo duna nan consuelo pero algo cu lo permiti nan tin un poco di recuperacion como parti di e proceso largo aki di luto,” el a bisa.
Zana Mamand Mohammed tabatin potret grandi di su ruman homber y otronan di Irak cu a fayece.
“Nan tabatin plan, soñonan,” el a bisa, su stem kibrando.
Zana, un oficial di polis Iraki Kurdo, a papia tocante Twana, su ruman homber di 18 aña cu manera varios otro tabata kier huy for di Irak cu ta consumi pa caos y guera y “bay otro caminda pa haya un otro bida.”
“Desde e naufragio aki, nos ta constantemente wardando pa haya mi ruman homber… pa tin un graf unda nos por bay y lamenta su perdida,” el a bisa.
E 14 hende homber, mayoria di nan naci na Afghanistan, ta para acusa di homicidio y facilitacion di inmigracion ilegal como parti di un grupo criminal organisa, y ta core riesgo di te hasta 10 aña den prison si condena nan.
Dos di nan ta suheto di orden di aresto y lo para huicio den nan ausencia.
Fiscalnan a acusa nan di a yuda lansa un “boto chikito cu no ta cumpli cu standard, sin certificacion, y no apto pa nabegacion den lama, yena di mas y cu falta di salbabida apropia.”
E sospechosonan a rechasa cu nan ta traficante y a desafia nan responsabilidad, of a presenta nan mes como migrante buscando haci e biahe nan mes. E caso tambe ta di perfil halto pa motibo cu tin otro caso altamente sensitivo di e investigacion, cual ta andando ainda.
7 personal di ehercito Frances ta bao investigacion desde 2023 pa motibo cu no a yuda hende den peliger.
Un investigacion di Reino Uni publica na februari a haya cu algun di e morto lo a ta “imposibel di evita” si autoridadnan Britanico y Frances lo a actua mas trempan pa rescata esnan abordo.
A pesar di yamadanan di problema, e ta casi 12 ora despues di e prome peticion pa ayudo prome cu finalmente a haya e boto.
Pa ora cu esey a yega, mayoria di esnan abordo a hoga caba.
E caso separa por resulta den otro huicio.
