Ex-minister di Infrastructura Otmar Oduber ta critica e manera cu gobierno ta maneha e discusion rond di ROPV y ceramento di ruta cu ta ser uza pa actividad off-road. Oduber, ken como minister tabata responsabel pa preparacion di Ruimtelijk Ontwikkelingsplan met Voorschriften (ROPV), a indica cu gobierno no ta duna suficiente claridad tocante responsabilidad pa e decision di pone baranca y cera caminda, y ta cuestiona e splicacion duna recientemente na tour operators.

Durante un conferencia di prensa di fraccion di PPA, Oduber a splica cu na 2009 gobierno a introduci Ruimtelijk Ontwikkelingsplan (ROP), un plan pa determina con Aruba ta organisa uzo y desaroyo di su tereno, bao di Landsverordening Ruimtelijke Ontwikkeling (LRO).

Segun Oduber, ROP tabata pone obligacion principalmente riba Gobierno y su departamentonan, pero no tabata duna e ciudadano derecho concreto tocante uzo di nan tereno. E ROP tabata establece e direccion pa planificacion y desaroyo di Aruba, pero durante casi 10 aña no tabatin un ROPV cu reglanan pa determina mas concretamente kico ta permiti den cada area.

Oduber a indica cu durante su periodo como minister, na 2018, trabao a cuminsa pa prepara ROPV. El a splica cu e intencion tabata pa crea un cuadro legal cu no solamente ta pone restriccion, pero cu tambe ta establece derecho pa ciudadano. Esaki ta inclui claridad tocante con un tereno por ser uza y posibilidad pa bay Corte si un ciudadano no ta di acuerdo cu un decision di gobierno.

Segun Oduber, ROP y ROPV ta hermentnan pa planifica desaroyo di Aruba y determina, entre otro, cua area mester ser proteha, unda construccion ta permiti, kico por ser construi y te na ki nivel. Den practica, esaki ta rekeri un balans entre proteccion di naturalesa y desaroyo.

Relaciona cu e situacion actual, Oduber a critica e informacion cu gobierno ta duna tocante ceramento di ruta cu tour operators ta uza pa actividad off-road. E asunto a bolbe haya atencion despues di un reunion entre prome minister Mike Eman y representantenan di tour guides, cu a expresa preocupacion tocante ceramento di camindanan cu baranca.

Oduber a cuestiona e splicacion cu gobierno no tabata na altura cu e camindanan lo ser cera y cu un departamento a actua. Segun e, no ta logico pa un departamento di gobierno tuma un decision asina sin instruccion of autorisacion di e minister competente. El a bisa cu e splicacion ta “absolutamente ridiculo”.

El a indica tambe cu e splicacion di prome minister na tour guides no ta cuadra cu loke minister Herde a bisa. Oduber a señala cu minister Herde a indica cu gobierno a dicidi pa cera e camindanan, despues di ricibi conseho di su abogadonan.

Oduber a afirma tambe cu, segun informacion cu el a ricibi for di DOW, no ta minister Herde a duna e instruccion pa cera e camindanan, sino prome minister mes.

“Pa despues bo bisa na e tour guides cu e departamento a actua riba su mes mi ta hay’e sumamente lamentable, mi ta hay’e un falta di liderazgo y mi ta haya cu bo kier tira e ambtenaar y e departamento bao bus. Y esey no ta aceptabel y bo mester papia berdad,” Oduber a subraya.

E discusion ta sigui den un momento cu tour operators ta pidi mas dialogo tocante acceso na ruta off-road, mientras proteccion di naturalesa ta un punto central den e debate. Segun Oduber, planificacion espacial mester establece claramente tanto e areanan cu mester ser proteha como e posibilidadnan pa desaroyo, mientras gobierno mester ta transparente tocante decisionnan cu ta afecta ciudadanonan y actividad economico.