Trahadornan di SETAR a organisa un walk-out ayera den oranan di atardi como expresion di preocupacion tocante incertidumbre rond di futuro di directiva di compania. Sindicato di Trahadornan den Telecomunicacion (STT) a indica cu e accion a sigui despues di varios intento pa haya claridad di Raad van Commissarissen y minister Rene Herde, particularmente tocante retiro di e actual director di SETAR y falta di claridad riba un sucesor.
Presidente di STT, Melba Koolman, a indica cu sindicato a trata na diferente ocasion di haya contacto via carta cu Raad van Commissarissen y minister Herde pa haya mas claridad tocante e situacion. Segun Koolman, falta di claridad a trece preocupacion entre trahadornan, particularmente pasobra actual director di SETAR, Roland Croes, ta acercando su edad di pension y ainda tabatin incertidumbre tocante un sucesor y e manera cu un eventual transicion den directiva lo tuma lugar.
Segun STT nan a pidi pa e actual director keda dos aña adicional na SETAR, cu e intencion di crea suficiente tempo pa prepara su sucesor na un forma responsabel. E idea ta pa durante e periodo aki habri un vacatura, selecciona un candidato y permiti e futuro director traha hunto cu e director actual, pa asina por haya guia y familiarisa su mes cu e compania y su proyectonan prome cu tuma e responsabilidad completamente.
STT ta considera continuidad particularmente importante den e periodo actual, teniendo cuenta cu SETAR tin proyectonan importante pa su futuro. Sindicato ta preocupa cu cambionan den directiva sin un transicion prepara por crea mas incertidumbre tanto pa compania como pa su trahadornan.
Koolman a indica cu na november di aña pasa e sindicato a reuni cu prome minister y a ser informa cu Croes lo keda dos aña adicional. Sinembargo, incertidumbre a bolbe aumenta despues cu director financiero di SETAR a retira y sindicato a haya indicacion cu tampoco tabatin suficiente claridad tocante si e director actual lo keda e dos adicional cu nan a pidi.
E situacion a aumenta preocupacion entre trahadornan y eventualmente a conduci na e walk-out, cu STT ta presenta principalmente como un accion pa busca claridad y stabilidad, y no como un discusion tocante salario of condicionnan financiero di directiva.
Despues di e incertidumbre, STT a haya noticia cu cu Roland Croes si lo keda como director di SETAR pa dos aña adicional. Sindicato ta considera cu e periodo aki mester ser uza pa prepara un transicion ordena, busca un sucesor y crea espacio pa e sucesor haya e conocemento necesario, mientras SETAR por mantene continuidad den su operacion y stabilidad pa su trahadornan.
Potret cortesia di Telearuba.
