Durante e ultimo Justitieel Vierlandenoverleg (JVO), e paisnan den Reino a yega na diferente acuerdo importante pa fortalece cooperacion riba tereno di husticia y enfrenta e retonan comun cu ta afecta siguridad di e paisnan. Minister di Husticia mr. drs. Arthur Dowers, hunto cu coleganan minister di husticia Nathalie Tackling di Sint Maarten, David van Weel di Hulanda y Shalten Hato di Corsou, a atende e diferente encuentronan di JVO na Willemstad.

Un di e resultadonan importante ta e Plan di Accion 2026-2029 pa atende cu criminalidad hubenil. Riba iniciativa di Corsou y cu sosten di Aruba, a trece e tema aki dilanti y bin cu un plan concreto pa atende cu e preocupacionnan relaciona cu hobennan cu ta cay den criminalidad. E plan ta crea un base pa e paisnan traha mas coordina y efectivo riba preveni y combati criminalidad hubenil.

E paisnan a acorda tambe pa mehora intercambio di informacion tocante personanan señala y pa organisa operacionnan di regreso conhuntamente pa personanan cu no tin estadia legal riba e islanan.

Proteccion di frontera ta un necesidad y no un opcion. Un bon control di frontera ta importante no solamente den cuadro di migracion, sino tambe pa preveni criminalidad transfronteriso y proteha siguridad di nos paisnan.

Intensifica lucha contra criminalidad organisa

Un otro punto importante di e JVO ta e compromiso pa intensifica accionnan contra criminalidad organisa. E meta ta pa preveni cu organisacionnan criminal por haya influencia of control den barionan, empresanan, aparato gubernamental of infrastructura critico manera waf y aeropuerto.

Ademas a acorda cooperacion structural cu partnernan den Reino contra traficacion di arma y droga, pero tambe contra organisacionnan criminal cu ta mina autoridad y integridad di institucionnan.

E magnitud di e reto ta grandi. Durante 2025, Kustwacht a intercepta mas cu 11 mil kilo di droga den awanan territorial. Esaki ta mustra e presion cu criminalidad transfronteriso ta pone riba e region y e necesidad pa sigui inverti den operacionnan conhunto.

Den e cuadro aki, un otro acuerdo importante ta pa sigui fortalece e lasonan di cooperacion entre Kustwacht, RST, Aduana, Koninklijke Marechaussee y partnernan internacional.

Minister Dowers a enfatisa cu cooperacion entre e paisnan no ta kita e responsabilidad propio cu cada pais tin pa su sistema di husticia.

“Husticia no ta un responsabilidad di Reino. Nos a dicidi boluntariamente pa traha hunto, paso nos sa cu si nos traha hunto, nos ta mas exitoso,” Minister Dowers a expresa.

Segun e Minister, cooperacion ta esencial pa logra resultado grandi riba tereno di husticia. Hustamente durante e Justitieel Vierlandenoverleg ta importante pa keda consciente cu e paisnan tin mester di otro.

Loke no por haci nos so, por logra hunto cu nos partnernan. E determinacion di esnan cu ta kere den siguridad y cu ta consciente di e necesidad pa traha hunto, ta esencial pa nos por enfrenta e retonan cu tin dilanti di nos.

ICT den cadena di husticia mester mehora

Un punto importante di atencion durante e deliberacionnan tabata e infrastructura di ICT entre e cuerponan policial den Reino. Na e momento aki tin espacio considerabel pa mehoracion y e partnernan den JVO a expresa cu nan no ta satisfecho di con esaki ta cana.

Pa atende cu esaki, un comision lo analisa e situacion y traha riba mehoracionnan necesario. Un infrastructura di ICT confiabel y moderno ta indispensabel pa intercambio di informacion y pa por garantisa funcionamento optimal di departamentonan den cadena di husticia.

Criminalidad organisa ta exigi mas capacidad y fondo

Finalmente, e aumento di gastonan den cadena hudicial tambe a haya atencion. Organisacionnan criminal awendia ta dispone di recursonan financiero considerabel, mientras cu paisnan chikito manera esnan den Caribe Hulandes mester uza nan fondonan limita na manera mas eficiente posibel pa enfrenta e organisacionnan aki.

Pa Minister Dowers, esaki ta exigi no solamente un uzo eficiente di e recursonan disponibel, sino tambe disposicion pa inverti extra unda esaki ta necesario. Den situacionnan cu ta rekeri fondo adicional, lo mester por demonstra y convence e partnernan den Gobiernonan di e necesidad pa haci e inversionnan necesario pa logra miho resultado.

E acuerdonan firma durante e JVO ta confirma e importancia di cooperacion entre e paisnan. Criminalidad organisa, traficacion di droga, control di frontera y otro retonan moderno no ta limita nan mes na frontera di un pais. Pa enfrenta nan efectivamente, intercambio di informacion, capacidad suficiente y cooperacion sostenibel entre e partnernan den Reino y internacional ta indispensabel.