(NLTimes) – Gobierno Hulandes a dicidi di pone un banda su plan pa prohibi pa personanan tapa nan cara durante manifestacion, un prohibicion cu mayoria den Parlamento a solicita. Den un carta na Parlamento, ministernan responsabel David van Weel di Husticia y Seguridad y Pieter Heerma di Asuntonan Interior a indica cu e legislacion actual tocante manifestacion ta ofrece suficiente posibilidad pa interveni ora ta necesario. Nan a agrega cu nan ta dispuesto pa papia cu Parlamento tocante con pa sigui cu e prohibicion solicita.

Na 2024, un mayoria parlamentario a sostene un mocion di lider di JA21 y lider di SGP, pa prohibi pa personanan tapa nan cara durante manifestacion. E mocion a sigui despues di protestanan violento anti-Israel na diferente universidad Hulandes. Pa introduci un prohibicion asina, minister di Husticia lo mester adapta Wet openbare manifestaties (WOM), e ley cu ta regla manifestacion publico.

Sinembargo, segun documentonan cu NRC a haya di Ministerio di Husticia y Ministerio di Asuntonan Interior via Wet open overheid (WOO), trabao riba e mocion a revela rapidamente cu practicamente tur instancia envolvi den maneho di manifestacion tabata contra di e prohibicion.

Ministerio Publico (OM), polis, alcalde, regionnan di seguridad, Comisarionan di Rey y hasta funcionarionan di Ministerio di Husticia a expresa obhecion contra e plan.

Un funcionario di Ministerio di Husticia a describi e propuesta manera algo cu no a ser pensa

bon y cu por tin un efecto contrario. Funcionarionan cu a consulta cu Ministerio Publico y polis a reporta cu e autoridadnan ta considera e prohibicion innecesario y ta preocupa cu esaki por conduci solamente na mas escalacion entre polis y manifestantenan.

Alcaldenan tampoco tabata na fabor di e prohibicion. Segun e documentonan, cada restriccion adicional den Wet openbare manifestaties ta aumenta e riesgo cu autoridad local lo mescla den contenido di manifestacionnan.

Segun NRC, Van Weel a sigui traha riba e propuesta a pesar di e falta grandi di sosten entre e diferente instancianan, principalmente pasobra Parlamento a solicita e medida. Un funcionario a señala cu ignora un peticion di Parlamento ta ser considera un falta politico serio.

Awor, sinembargo, gobierno aparentemente a dicidi pa no sigui cu e plan den su forma original. Den e carta manda na Parlamento, dilanti di un debate riba e topico programa pa mas laat e siman aki, e ministernan a indica cu Wet openbare manifestaties actual, den principio, ta ofrece suficiente espacio tanto pa facilita como pa limita derecho di manifesta.

P’esey, e Gabinete no tin intencion di haci cambionan drastico na e sistema actual.

E prohibicion di tapamento di cara ta ser menciona solamente den un frase den e carta. Gobierno ta indica cu e ta dispuesto pa sigui papia cu Parlamento tocante e peticion pa introduci tal prohibicion.