(NLTimes) – Varios miles di trahador den transporte publico a stop di traha ayera, segun sindicato FNV. E sindicatonan a organisa un welga nacional contra plannan di gobierno Hulandes pa recorta cierto presupuesto di seguridad social. E cifra ta un calculacion inicial di e sindicato mas grandi di Hulanda. Otro sindicato, incluyendo CNV, tambe ta participa.
Practicamente no tabatin trein ta core debi na e welga di 24 ora. E stacionnan di NS tabata bashi diaranson mainta. Den cierto region tampoco tabatin bus, tram of metro ta core, manera na Den Haag, Rotterdam y Amsterdam. E compania di transporte Arriva a purba di brinda su servicionan mas normal posibel, pero tambe mester a cancela hopi bus.
E welga den transporte publico ta un di e accionnan di sindicatonan contra e recortenan den seguridad social. E sindicatonan kier pa elimina completamente e recortenan anuncia. E siman aki tin welga tambe na e companianan den sector di metal y construccion. Trahadornan di haf ya a tene welga.
Organisacion di biahe Rover a critica e welganan. “E welga tin un proposito. E sindicatonan ta trata di defende personanan vulnerabel cu ta ser afecta pa e recortenan,” director di e organisacion, Daan Zieren, a bisa NOS. “Pero precisamente e personanan vulnerabel ta keda ainda mas isola debi cu awe nan ta ser priva di mobilidad. P’esey nos ta boga pa otro manera di tene accion.”
Lider di fraccion parlamentario di D66, Jan Paternotte, y Jesse Klaver di Pro a papia cu chauffeur y otro trahadornan di transporte publico cu tabata den welga na Den Haag. Otro politiconan tambe tabata presente, entre nan parlamentarionan di SP Sandra Beckerman, kende a grita na esnan protestando cu “tin solamente un solucion posibel: welga, welga, welga!”
Paternotte a bisa cu e ta decepciona cu e plannan pa tene welga. “Warda pa nos plannan ser presenta riba Prinsjesdag, despues boso por bay den welga. Pero bon, awe ya a sucede,” el a bisa NOS. Klaver, lider di e partido di oposicion mas grandi, a bisa cu e ta comprende e welga. “Mester elimina e recortenan den seguridad social. Actualmente cos ta stanca na Den Haag, pero mi ta spera cu e gabinete ta scoge un direccion.”
