(NLTimes) – Durante e Debate Politico General, lider di PVV, Geert Wilders a bolbe pone hopi enfasis riba migracion y a propone medidanan cu, segun criticonan, por ta contra derechonan fundamental y acuerdonan internacional. Segun Wilders, pa PVV tempo di hunga a caba. Entre su proposicionnan tin creacion di un servicio fuerte di control y aplicacion di ley, similar na e controversial Immigration and Customs Enforcement (ICE) di Merca. Su partido tambe a bolbe pidi pa Hulanda sali for di Union Europeo.
Entre e medidanan cu Wilders a propone tin deportacion masivo di personanan cu no tin residencia legal, y regreso inmediato di Sirio y Ucranianonan.
Pa loke ta trata e servicio nobo, Wilders kier pa esaki busca activamente migrantenan sin documento y haci inspeccion of operacion di control na negoshi, casnan y misa si tin motibo pa sospecha cu personanan sin residencia legal ta keda eynan.
Wilders ya a boga pa deportacion masivo zomer pasa riba X. E ora ey, e no a aclaria exactamente na ken e tabata referi, pero a papia di criminalnan y a comparti un noticia tocante un homber cu a forsa un otro persona participa den actonan sexual.
Anne de Jong, profesor asociado na Universiteit van Amsterdam, cu su investigacion ta concentra riba poder, politica y conflicto, a bisa cu referi na deportacion masivo den e contexto aki ta discriminatorio. El a describi e declaracionnan di Wilders manera un ehempel clasico di retorica populista cu ta debilita estado di derecho y enfatisa division den sociedad. Anteriormente, lider di PVV a ser condena pa insulto di un grupo, relaciona cu comentarionan cu el a haci na 2014 tocante su deseo pa tin menos Marocano na Hulanda.
Jesse Klaver a confronta Wilders despues cu e lider di PVV a compara e movemento hubenil di PRO cu Hitlerjugend, relaciona cu posicion di e partido tocante Israel. Klaver a indica cu e tipo di discurso aki di Wilders ta conoci, pero cu compara hobennan cu Hitlerjugend ta pasa e limite di loke ta aceptabel den un debate. Presidente di Tweede Kamer, Thom van Campen, cu ta miembro di partido VVD, parti di coalicion, no a interveni.
Den añanan anterior, Wilders frecuentemente a hala atencion durante e debatenan cu declaracionnan controversia, cu a haci otro parlamentario interumpi su discurso. E biaha aki, sinembargo, tabatin considerablemente menos interupcion.
Fuera di Klaver, solamente parlamentario independiente Mona Keijzer y lider di DENK Stephan van Baarle a cuestiona e lider di PVV. Van Baarle a pidi Wilders pa stop di constantemente señala Hulandesnan pa motibo di nan religion of origen, y pa acepta cu algun ciudadano Hulandes por tin un otro apariencia cu esun di dje.
PVV tambe a bolbe expresa su deseo pa Hulanda sali for di Union Europeo. Wilders a bisa cu un “Nexit” ta necesario pa evita cu migrante y solicitante di asilo bin Hulanda.
El a sigui bisa cu PVV durante un tempo tabatin speransa cu por a stop migracion mientras Hulanda keda den Union Europeo, pero cu esaki no a resulta exitoso. Segun Wilders, ta parce cu finalmente un Nexit ta e unico opcion pa Hulanda. Pa hopi aña, salida di Union Europeo tabata un parti central di plataforma politico di PVV.
Na april 2024, Wilders a elimina e demanda di PVV pa un Nexit for di su programa electoral pa eleccion di Parlamento Europeo, indicando cu no tabatin suficiente sosten publico na Hulanda pa sali for di Union Europeo. Encuestanan di e tempo ey a mustra cu, den un referendum hipotetico, 67% di votadonan Hulandes lo a vota pa keda den Union Europeo, compara cu 17% cu lo a vota pa sali.
