(AFP) – Gobierno di Noruega a bisa dialuna cu e kier un prohibicion temporal riba uso di bril inteligente den cierto luganan publico, citando preocupacionnan tocante privacidad, specialmente grabacion di imagen sin cu e personanan graba ta altanto.
E prohibicion por aplica na parke, beach, museo, centro comercial, scol, centro di cuido pa mucha, facilidad di salud, gym y eventonan publico.
Partido Laborista, cu ta lidera un gobierno minoritario, tin mester di sosten di otro partidonan pa aproba e prohibicion propone.
Gobierno a bisa cu e tin plan pa presenta un proyecto di ley “tan pronto posible”, mientras un grupo di expertonan lo ser encarga pa prepara regulacionnan permanente tocante e asunto.
Gobierno a aclaria cu e no ta busca un prohibicion completo riba e brilnan.
E medida ta bin mientras bril inteligente — specialmente esnan cu Meta ta bende bao di marcanan popular manera Ray-Ban y Oakley — ta causando preocupacion creciente na Europa.
Na Francia, grupo pa bienestar di mucha e-Enfance a bisa luna pasa cu e a ricibi alrededor di 20 rapport di hende muhe cu a ser filma sin nan consentimento, y den mayoria di e casonan ey a ser usa bril di Meta.
Algun di e videonan despues a ser comparti riba social media y a hiba na casonan di burla of mensahenan di odio, loke a causa cu Fiscalia Publico di Paris a habri un investigacion.
Capital di Noruega, Oslo, ya a dicidi prohibi bril cu camara den scolnan, mientras tin cada biaha mas yamada pa regulacion mas estricto den Union Europeo y Reino Uni.
Meta ta bisa cu su brilnan tin un luz LED cu ta blink ora un potret of video ta ser graba, y cu e luz no por ser paga sin haci e camara inutilisabel.
