(AFP) – Presidente Mericano Donald Trump, cu a bisa cu e kier cu termino “super inteligencia” reemplasa inteligencia artificial, a bisa diahuebs cu cualkier hende cu no sigui su deseo lo ser trata como “E ENEMIGO,” sin splica cua consecuencianan esaki lo tin.
“Cas blanco ta considera cualkier hende cu usa e termino ‘Inteligencia Artificial’, en bes di e termino nobo, mas acepta y mas exacto ‘Super Inteligencia’, como E ENEMIGO!” Trump a skirbi den un publicacion riba su red Truth Social.
Trump a menciona su propuesta pa cambia e nomber durante un discurso dilanti di Asamblea General di Nacionnan Uni luna pasa, bisando cu su termino nobo “ta zona hopi miho.”
Despues, na fin di september, Trump a firma un orden ehecutivo cu ta obliga uso di “super inteligencia” den Gobierno Mericano.
E obligacion ey no ta aplica na sector priva, pero algun companianan ya ta adopta e termino, incluyendo grupo Meta di Mark Zuckerberg.
Aliado di Trump, Elon Musk, tambe ta usa “super inteligencia” den su publicacionnan riba red X.
E debate tocante e termino ta principalmente politico. Presidente Mericano, cu a defende uso di AI fuertemente, ta purbando di duna e tecnologia un imagen mas positivo memey di preocupacionnan creciente tocante seguridad di AI y molestia tocante expansion di data centernan na Merca.
Mas generalmente, Trump ta conoci pa cambia nomber di cosnan of crea sobrenombernan. Awo e ta yama Golfo di Mexico “Golfo di America” y a cambia nomber di Lake Ontario pa “Lake America”.
