Aruba a experencia a crecemento continuo den turismo y prestamo den sector priva durante augustus 2026, mientras inflacion a acelera y entrada di gobierno a baha compara cu e mesun luna di siman pasa.

E desaroyonan aki a keda reporta den e Monthly Economic Bulletin pa augustus 2026, publica dia 2 di october pa Banco Central di Aruba (CBA).

Segun CBA, e Indice di Prijs di Consumidor a aumenta cu 2,7 porciento compara cu augustus 2025. Esaki a representa un aceleracion di e tasa anual di inflacion di 2,2 porciento registra na juli 2026.

Transporte tabat e contribuidor principal pa e aumento mensual den prijs di consumo. Otro categoria registrando aumento ta inclui cuminda y bebida no-alcoholico, vivienda, salud, comunicacion, restaurant y hotel, y diferente bienes y servicio.

Exluyendo cuminda y energia, ‘core inflation’ tabata para na 1,1 porciento compara cu augustus 2025.
Mientras tanto, e tasa di inflacion mensual averahe den 12 luna a aumenta di 0,7 porciento na juli pa 1,0 porciento na augustus.

Menos entrada di gobierno a pesar di a colecta mas impuesto

Entrada total di gobierno tabata Afl. 133,5 miyon na augustus 2026, repersentando un caida di Afl. 33,9 miyon compara cu augustus 2025, tempo cu entrada a alcansa Afl. 167.4 miyon. Sinemabrgo, e caida no a bin pa motibo di menos impuesto colecta. Entrada di impuesto a aumenta cu Afl. 17,2 miyon, alcansando Afl. 130,9 miyon.

E aumento tabata atribui principalmente na entrada mas halto di impuesto riba divisa, impuesto riba salario, y BBO/BAVP.

Entrada cu no ta di impuesto, di otro banda, a cay cu Afl. 51,1 miyon, di Afl. 53,7 miyon na augustus 2025 pa Afl. 2,6 miyon na augustus 2026.

E tabelnan estadistico di CBA ta indica cu entrada cu no ta di impuesto ta inclui distribucion di dividend. Cifranan di augustus no ta establece con hopi di e caida anual a resulta specificamente for di cambio den pago di dividend.

E cifranan pa juli y augustus 2026 tambe ta exclui entrada for di Departamento di Impuesto cu no ta di impuesto, segun un cualificacion compañando e tabel estadistico.

Prestamo di sector priva ta sigui expande

CBA a reporta cu e oferta monetario amplio di Aruba a aumenta cu Afl. 123,7 miyon durante augustus, alcansando Afl. 7,64 biyon.

E aumento tabata asocia principalmente cu activo domestico mas halto, mientras cu activo stranhero neto a baha un tiki ora a exclui diferencia di revaluacion.

Credito domestico a aumenta cu Afl. 143,9 miyon durante e luna, incluyendo un expansion di Afl. 105,6 miyon den reclamo di sector bancario riba sector priva.

Prestamo comercial a conta pa mayoria di e aumento aki, aumentando cu Afl. 82,1 miyon. Hipoteca pa vivienda a aumenta cu Afl. 14,8 miyon, mientras credito di consumidor a crece cu Afl. 8,6 miyon.

Pa fin di augustus, reclamo total di sector bancario riba sector priva tabata aproximadamente Afl. 5,1 biyon, compara cu Afl. 4,42 biyon na augustus 2025.

Deposito di gobierno dentro di sistema monetario a baha cu Afl. 38,2 miyon durante augustus, alcansando Afl. 663,4 miyon.

E reduccion den deposito di gobierno a contribui na un aumento den e reclamo neto di sector bancario riba sector publico. Sinembargo, gobierno toch a mantene deposito excediendo e reclamo bruto di sistema monetario riba sector publico.

Crecemento di turismo ta keda fuerte, particularmente for di Latino America

Aruba a ricibi 145.750 bishitante stay-over na augustus 2026, un aumento di 13.022 bishitante of 9,8 porciento, compara cu augustus 2025.

E crecemento porcentual mas fuerte a bin for di Latino America, unda yegada a aumenta cu 47,8 porciento, representando 10.506 bishitante adicional. Segun CBA, e aumento aki tabata impulsa principalmente pa bishitante for di Argentina y Colombia.

Yegada di bishitante Nort Americano a aumenta cu 1,6 porciento, representando 1.565 bishitante adicional. Dentro di e mercado aki, yegada for di Merca a aumenta cu 1,4 porciento.

Yegada di bishitante for di Europa tame a aumenta, subiendo cu 16,6 porciento cu bishitante adicional originando principalmente for di Italia y Reino Uni.

E cantidad total di anochi di bishitante a alcansa 967.001, un aumento di 11,4 porciento compara cu augustus 2025. E promedio di anochi cu bishitantenan tabata planea di keda na Aruba a aumenta levemente di 6,5 pa 6,6 anochi.

Turismo crucero a registra 38.096 pasahero y 13 ship call durante augustus, compara cu 48.518 pasahero y 15 ship call den e mesun luna aña pasa.

Estadistica di turismo di CBA ademas ta indica cu, durante prome ocho luna di 2026, yegada di turista stay-over a aumenta cu 11,1 porciento compara cu e periodo corespondiente na 2025. Anochi di bishitante a aumetna cu 11,5 porciento.

Diferente desaroyo den economia

E cifranan di augustus ta ilustra desaroyonan den contraste dentro di economia di Aruba. Yegada di turista y anochi di bishitante a sigui aumenta, mientras negoshi y hogarnan a obtene credito adicional na banco.

Na mes momento, prijs di consumidor a aumenta na un tasa anual mas lihe cu na juli, y entrada total di gobierno tabata menos cu na augustus 2025, a pesar di un aumento den e cantidad colecta den impuesto.

E cifranan ta duna un bista di condicion monetario, inflacion, entrada di gobierno, y actividad di turismo, pero riba nan mes, nan no ta establece si e aumento den actividad economico a traduci den mehoracion den poder di compra di famianan Arubiano, of finanzas di gobierno.