Un accidente grave di UTV a tuma lugar riba 13 di september ultimo den cual un muher hoben a perde su bida. Mesora despues di e accidente a start cu un investigacion pa asina determina kico precies a pasa.
Inicialmente e investigacion tabata den man di Cuerpo Policial di Aruba (KPA), pa despues pasa pa Marechaussee (KMar). Keto bay e investigacion ta andando bao guia di Ministerio Publico di Aruba.
Den e periodo despues di incidente, a surgi hopi pregunta den medionan di comunicacion y tambe di parti di famia di e fayecido, tocante kende tabata stuur e UTV na momento di e accidente. A sugeri cu e muher hoben imposiblemente lo por tabata e chauffeur.
Sin embargo, for di e resultadonan di investigacion disponibel te awor, incluyendo grabacion di video, a sali na cla cu ta e victima mes tabata stuur e UTV.
E investigacion no ta termina ainda. Actualmente tin investigacion tecnico andando.
Considerando e atencion di comunidad pa e asunto aki, Ministerio Publico ta haya cu ta importante pa comparti e informacion tocante e chauffeur alvast cu tur hende pa asina brinda claridad tocante e aspecto aki. Por lo demas, Ministerio Publico lo no bisa nada mas te cu e investigacion keda full finalisa.
