Miembronan di Parlamento, Evelyn Wever-Croes y Rocco Tjon, na nomber di fraccion MEP, a presenta siman pasa un apelacion na Corte di Prome Instancia di Aruba, di LAR, contra e decision di minister Gerlien Croes di 28 di augustus 2026 pa nenga di contesta preguntanan tocante su biahe oficial pa Corsou riba 19 di november 2025 cu un avion priva.

E apelacion ta basa riba varios motibo. MEP ta cuestiona cu e minister a mantene su decision original, apesar cu e Bezwaaradviescommissie LAR a bisa cu e minister mester contesta. Segun MEP, e minister no a motiva suficientemente dicon el a desvia di e conseho di LAR.

Minister a paga parti di landing fee pero no kier duna recibo

Un punto central ta cu e minister di un banda ta declara cu el’a paga parti di e “landing fee” na Corsou, pero ta nenga di presenta prueba di esaki. Segun e minister esaki ta algo personal. Den esaki Wever-Croes y Tjon ta diferencia di opinion. “Un recibo asina relaciona cu un biahe di trabou no ta algo personal. Ademas, si tin informacion personal mes riba e recibo, por ehempel number di cuenta, of mas nomber, e por delete e informacion personal ey, y demostra e otro parti di e prueba di pago”.

Minister a ricibi un regla di ken y pa cuanto?

Cu e declaracion nobo aki di e minister, ta keda proba cu e minister a ricibi un regalo. Si e minister ta papia berdad cu el a paga apenas un parti di e gastonan, esey kiermen cu un otro persona a paga e resto di e gastonan. Den e caso ey, esaki ta wordo considera un regalo. Mester puntra bo mes e ora: ken a paga e demas gastonan y DICON e persona ta paga e demas gastonan? Ora un minister ricibi regalo, tin reglanan ancra den e Codigo di Conducta di ministernan cu e mester cumpli cu ne.

Ministerio no a cumpli cu Codigo di Conducta

Finalmente, MEP ta cuestiona cu e minister no a cumpli cu e Codigo di Conducta pa Minister. E Codigo aki ta stipula pa cuminsa cu ministernan mester ta hopi cauteloso den acepta regalo. Si acepta regalo mes, mester declara esaki. Minister Mike Eman a declara na Parlamento cu Minister Gerlien Croes no a declara e regalo aki. Ademas, e Codigo ta stipula cu si e minister ricibi un biahe regalo, mester trata e regalo aki extensamente den Conseho di Minister, prome cu acepta e biahe. Den e caso aki, minister Gerlien Croes nunca a trata e topico di regalo den Conseho di Minister. El a djis informa Conseho di Minister cu el a biaha un dia adelanta, pero no a haya aprobacion explicito di Conseho di Minister pa acepta e regalo. Corte den Prome Instancia di LAR lo cuminsa trata e caso aki proximamente.

MEP a pidi Corte pa dicta cu e contesta di e minister di 28 di augustus ultimo no ta corecto, y pa e minister contesta e preguntanan: cuanto el a paga, na ken el a paga y ki dia el a paga.

Transparencia no ta un fabor, e ta un deber di tur minister. Pa MEP, transparencia y control parlamentario ta esencial pa garantisa dunamento di cuenta den gobernacion.