(AFP)—Universidad Cornell a suspende fiestanan y eventonan social di fraternidadnan pa e resto di e aña academico diamars, despues di protestanan tocante un presunto violacion den grupo na un di e clubnan exclusivamente masculino di e universidad prestigioso.
E incidente di 2024, describi den detaye den un demanda legal presenta luna pasa, a provoca acusacionnan cu e institucion di Ivy League na estado di New York no a castiga adecuadamente e hombernan envolvi.
E muhe cu a presenta e acusacion a declara cu el a keda presiona pa uza ketamina, y cu shete miembro di fraternidad Chi Phi a agredie y viol’e. Chi Phi ta un di varios organisacionnan conoci como “Greek life”, cu ta comun na universidadnan na Merca.
Presidente di Cornell, Michael Kotlikoff, a declara cu e suspension “lo duna tempo pa un evaluacion profundo di fraternidadnan na Cornell, pa determina si y con nan por sigui funciona na un manera sigur”.
“Mi ta lamenta profundamente e daño cu Jane Doe a sufri na 2024, y mi ta consterna cu e acto di violencia sexual aki a sucede den nos comunidad di Cornell,” el a agrega, referiendo na e nomber ficticio di e muhe cu a presenta e acusacion.
Despues di su prome acusacionnan, Cornell a cera e fraternidad y a suspende temporalmente e studiantenan masculino acusa, di cual dos a keda expulsa posteriormente.
Sinembargo, criticonan a declara cu e reaccion di e universidad tabata demasiado suave, loke a motiva e institucion pa cuminsa un investigacion independiente.
Miles di studiante y miembro di personal academico a reuni na Cornell e luna aki pa exigi husticia pa e muhe cu a presenta e acusacion, mustrando borchinan cu tabata bisa “Haci nan responsabel” y “Proteha sobrevivientenan”.
Manifestantenan tambe a reuni na New York, Boston y otro ciudadnan Mericano pa mustra apoyo na e muhe, mientras usuarionan di red social a comparti e hashtag #IAmJaneDoe riba TikTok, X y Instagram.
‘Cero tolerancia’
Cornell a nombra Sally Yates, un ex-fiscal di alto rango na Merca, pa evalua e reaccion di e universidad riba e acusacionnan di violacion.
Sinembargo, dirigiendo su mes na comunidad di Cornell, Kotlikoff a declara diamars cu “ta cla cu nos no por warda e resultadonan aki pa tuma accion”.
El a declara cu e suspension di eventonan social di fraternidad ta drenta na vigor inmediatamente y cu lo tin “cero tolerancia” pa cualkier violacion di e medida. “Cualkier fraternidad cu organisa un fiesta of evento social den su propio edificio lo ricibi un suspension di emergencia inmediatamente,” Kotlikoff a declara.
El a anuncia otro medidanan, incluyendo nombramento di un empleado dedica pa apoya personanan cu ta reporta conducta sexual inapropia, y invitacion na detectivenan specialisa di Polis di Estado di New York pa investiga futuro acusacionnan di agresion sexual.
Mientras tanto, fiscalia a habri atrobe un investigacion tocante e presunto violacion den grupo, despues cu gobernador Kathy Hochul a nombra fiscal general di estado, Letitia James, pa dirigi e caso.
Esaki a sucede despues cu autoridadnan local a declara cu nan a dicidi di no inicia un proceso penal na 2024, pasobra testimonio di e muhe cu a presenta e keho no a establece falta di consentimento.
Na Merca, un di cada cuater studiante femenino di nivel universitario a experencia contacto sexual forsa of contacto sexual pa cual nan no por a duna consentimento, segun un estudio di 2020 cu a inclui 33 institucion y cu a ser conduci pa Asociacion di Universidadnan Mericano.
E organisacion sin fin di lucro dedica na salud mental, Jed Foundation, a reporta cu hombernan cu ta miembro di fraternidadnan, cu frecuentemente ta ricibi critica pa encubri sexismo, tin mas probabilidad di comete violencia sexual.
