Director di HOH: Cuido medico mester ta responsabilidad di Reino?

Den un articulo di opinion publica dia 10 di october riba su pagina di LinkedIn, Sr. Jacco Vroegop, director di HOH a pone pregunta dilanti si ta necesario pa considera cuido medico como un responsabilidad di Reino. Vroegop su proposicion ta bin den reaccion na comentarionan haci pa parlamentarionan Hulandes, ken a critica maneho pa aloca extra fondo pa hospitalnan di Boneiro, Saba y Sint Eustasius (BES). Den su reaccion, Vroegop ta subraya e hecho cu cuido medico di tur seis isla ta estrechamente dependiente riba otro, y ta boga pa mas cooperacion riba nivel di Reino, manera ta haci pa Defensa.

Preocupacion di e director a surgi despues cu parlamentario Hulandes Elmar Vlottes y Rachel van Meetelen (PVV) a propone pa anula fondo extra pa sector di cuido medico di islanan BES, cu Vlottes bisando cu mester anula e extra 30 miyon euro destina, y van Meetelen entregando mocion cu no mester pone ni un cen extra pa e islanan mientras na Hulanda e sector ta mira recorte di fondo. Vroegop ta remarca cu Hulanda su mentalidad rondonando islanan den Caribe Hulandes ta alarmante y ta cuestiona pakico e islanan aki ta haya diferente tratamento cu otro municipalidadnan den Hulanda Europeo.

Pa director di HOH, e distincion entre islanan den Caribe Hulandes y Hulanda Europeo te ainda no ta haya reconocemento adecua pa gobierno di Hulanda. Manera Vroegop ta nota, structura administrativo den sector di cuido ta diferente riba islanan den Caribe. Legislacion, y condicionnan geografico y social tambe ta hunga un rol significante den loke cada municipalidad mester di dje. A pesar di e diferencianan aki, e no ta cambia responsabilidad cu Hulanda mester tin pa su residentenan riba e islanan aki, segun Vroegop.

Pero kico esaki tin di haber cu islanan CAS (Corsou, Aruba, Sint Maarten), cu ta autonomo y pues ta principalmente responsabel pa su mesun maneho di su sectornan di cuido? Segun Vroegop, e buraconan cu ta existi den cuido medico riba islanan BES ta trece consecuencia pa nos tambe.

E director a punta na par ehempel, manera con Boneiro ta depende riba material di oxigeno via Corsou y con Aruba a ofrece sosten na mas cu 80 pashent evacua durante Horcan Irma na 2017. Ademas a señala cu islanan BES ta depende riba cuido specialisa for di islanan CAS. Problemanan cu capacidad of financiamento riba un isla por tin consecuencia director pa pashentnan riba un otro isla. Manera Vroegop ta enfatisa, e vulnerabilidad aki ta relevante caba pa hospitalnan di Aruba y Corsou.

Esaki, manera Vroegop ta bisa, ta mustra con tur e islanan—autonomo of no—den Reino Hulandes ta carga otro. P’esey ta importante pa fortalece cooperacion regional, segun e director.

E director ta nota cu dentro di un Reino den sector di cuido medico, responsabilidadnan administrativo, financiamento y regulacion, entre otro, ta ser organisa specificamente pa cada pais individual mientras cu den practica institucionnan ta depende riba otro diariamente. Pa e motibo aki, Vroegop ta cuestiona si ta tempo pa considera seriamente si cuido medico—den mes manera cu Defensa—mester bira un asunto di Reino.

Un manera pa haci esaki, Vroegop ta propone, ta riba nivel di Reino por medio di Statuut di Reino.

A bisa cu Statuut di Reino ta ofrece oportunidadnan di cooperacion cu segun e Reino no ta utilisando te na su potencial maximo. Vroegop a enfatisa cu aunke e marco actual ta reconoce cu cuido medico ta un asunto nacional (esta tur pais ta dicidi con nan ta maneha nan sector), e statuut ta ofrece espacio pa amplia cooperacion via acuerdonan mutuo por medio di haci cierto asuntonan responsabilidad di Reino via acuerdo mutuo. Pa esaki, el a nota, mester modifica e marco cu tin actualmente.

Na otro banda, e director di hospital ta enfatisa cu ya por amplia cooperacion dentro di e marco cu ta existi caba. Como ehempel, e ta menciona acuerdonan conhunto riba cuido specialisa, despliegue di profesionalnan riba tur isla, referencianan medico, facilidadnan di crisis y financiamento di funcionnan regional. Manera e ta sigui splica, bon cuido medico ta rekeri inversion den medidanan di prevencion, educacion, ambiente di bida y cuido primario. Esaki ta specialmente relevante pa islanan chikito, e director ta splica, unda malesa cronico y capacidad limita den cuido medico por tin consecuencianan serio. “Aki tambe tin un responsabilidad conhunto,” Vroegop ta remarca.

P’e, e reunion di e cuatro pais den Reino na november ta presenta un oportunidad pa atende cu e pregunta aki. Vroegop ta subraya cu ademas di gobiernonan, proveedornan y profesionalnan di cuido medico, como tambe seguronan y otro instancianan di financiamento mester ta envolvi den e debate aki.

E idea pa amplia cooperacion den Reino no ta nobo, Vroegop ta subraya. Segun e mes ta conta den su relato, Nationaal Coördinator tegen Discriminatie en Racisme (NCDR) ya a recomenda den su investigacion riba Igualdad na Hulanda na april 2026 cu cuido medico di emergencia por ser considera un asunto di Reino. Segun e ta splica, esaki ta rekeri curashi pa trece cambio administrativo pa sigura cooperacion conhunto dentro di Reino. Vroegop a clarifica cu pa Aruba, Corsou y Sint Maarten, esaki no ta nifica entrega maneho di nan sector di cuido, pero e ta recomenda pa investiga si e division di responsabilidad ainda ta den cuadra cu e realidad riba tur seis isla den Caribe Hulandes. “Esaki pa sigura cu cada residente di Reino, ni maske unda nan ta biba, por conta riba acceso na tempo na cuido adecua y di calidad ora mester,” e director ta enfatisa.

E articulo di Sra. Vroegop ta bin memey di negociacionnan di HOH y gobierno di Aruba pa yega na un areglo tocante e debe di 29 miyon florin cu gobierno tin cu HOH. Vroegop a bisa cu e suma habri ta trata cuido medico necesario cu a duna na hende cu ta biba na Aruba pero no ta cubri pa AZV, y hopi biaha no por paga pa nan mes. HOH ta enfatisa cu gobierno pa añanan no a establece un areglo structural determinando ken mester cubri e gastonan aki. Durante e periodo aki di incertidumbre, HOH ta cubriendo e gastonan aki via otro entrada di hospital.

Vroegop a bisa cu esaki ta nifica cu recursonan destina pa cuido regular di salud pa poblacion sigura na Aruba ta siendo uza indirectamente pa cubri cuido pa pashent cu no ta sigura.

Bon Dia Aruba recien a acerca HOH puntrando pa un actualisacion tocante e negociacionnan. Pa loke ta gastonan relaciona cu cuido necesario pa indocumentadonan riba e isla, vocero di hospital a afirma cu pronto lo tin un ultimo intento pa yega na un acuerdo. Segun e ta conta nos, ainda ta wardando pa minister Dowers stipula un fecha pa e combersacion.

E situacion di cuido medico necesario pa indocumentadonan ta presenta un presion adicional riba capacidad di hospital, treciendo consecuencianan significante pa ciudadanonan di Aruba y lantando pregunta tocante responsabilidad di gobernantenan pa maneha e sector adecuadamente. Na mesun momento, mester cuestiona si por a preveni e situacion si cooperacion entre islanan y Hulanda tabata mas fuerte den e sector aki. Den otro palabra, ora ta trata di un situacion manera demanda halto di cuido medico urgente pa indocumentadonan riba un isla, esaki por ta un asunto cu Reino henter mester atende?