Hopi muhe ta plania nan bida rond di nan ciclo menstrual; dunadornan di trabao no tanto

(NLTimes)—Cuarenta porciento di muhenan cu ta menstrua of ta pasando door di menopausa ta organisa nan bida rond di nan ciclo, segun un encuesta conduci pa e panel di RTL Nieuws. Segun e encuesta, cada bes mas muhe ta scoge pa programa citanan importante y cierto entrenamentonan durante e simannan cu nan tin mas energia.

Mientras tanto, cifranan ta mustra cu kehonan di salud relaciona cu menstruacion y menopausa ta afecta capacidad di mas di un miyon muhe na Hulanda pa traha. Sinembargo, apenas seis porciento di e acuerdonan laboral colectivo ta tene na cuenta cu sintomanan di menstruacion y menopausa.

Tres cuarto parti di e participantenan a declara cu de vez en cuando nan ta tene na cuenta cu nan ciclo, por ehempel, pa compronde miho nan emocionnan y cambionan den estado di animo.

Un miembro di e panel a comenta: “Mi ta purba pone un tiki mas atencion na mi alimentacion y ta mas consciente di mi emocionnan.”

“Ora mi ta traha plannan, mi ta purba hacie durante e ‘fasenan bon’ di mi ciclo, pasobra e ora ey mi tin mas energia. Mi ta haci mescos na trabou, por ehempel, ora mi mester duna un presentacion.”

Un otro participante a declara cu rond di ovulacion e ta scoge entrenamento di forsa of, en general, ehercicionan mas intenso, mientras cu rond di menstruacion e ta prefera yoga.

Otro muhenan ta evita salidanan social prome cu nan menstruacion.

“Mi no ta programa actividadnan social prome cu mi menstruacion, y mi no ta tuma decisionnan grandi. Unda cu ta posibel, mi ta traha for di cas,” un muhe a declara.

Casi mita di tur e muhenan den e panel ta kere cu sintomanan di menstruacion y menopausa simplemente ta parti di bida y cu no tin nada cu por haci contra nan.

Sinembargo, cifranan di TNO ta mustra cu kehonan relaciona cu menstruacion y menopausa ta afecta trabou di mas di un miyon muhe.

A pesar di esaki, apenas seis porciento di e acuerdonan laboral colectivo ta inclui disposicionnan pa trata cu e sintomanan ey. Compania di trein NS, por ehempel, si tin e tipo di acuerdonan aki y actualmente ta investigando con efectivo nan ta.