Na juni y september 2026, Gobierno a duna dos contracto na Departamento di Impuesto (DIMP) sin destaho publico. ITP Caribbean Aruba N.V. a haya Afl. 1.410.305, y un consehero priva, via InterFacilities Aruba VBA, a haya te cu Afl. 420.000. Hunto ta trata di Afl. 1.830.305 di placa di contribuyente, sin cu ningun otro empresa a haya e oportunidad di duna un oferta.

E regla ta cla

E Aanbestedingsverordening ta exigi un destaho publico pa tur contracto di mas cu Afl. 200.000 (articulo 10). Tur dos contracto ta pasa e limite ey. Articulo 16 ta permiti un excepcion, pero un excepcion ta pa casonan excepcional. Pa tur dos contracto, Gobierno a uza e mesun motibo: un servicio specifico unda “confiansa ta esencial”. Den e decisionnan ministerial no tin ningun consulta di mercado ni comparacion di oferta.

Confiansa no ta un rason pa evita competencia. Confiansa ta wordo garantisa den e destaho mes, cu exigencia, screening y un bon contracto. Y Gobierno mes ta proba cu esey ta posibel: na juli 2026, un otro departamento a publica un destaho publico pa e mesun tipo di servicio.

Gobierno ta paga su mes compania

ITP Caribbean ta un compania di Setar N.V., y Setar ta propiedad di Gobierno di Aruba. Cu otro palabra: Gobierno a duna Afl. 1,4 miyon, indirectamente, na su mes compania, sin compara cu ningun otro oferta. Den e mesun periodo, Setar y ITP hunto a haya cinco contracto sin destaho na diferente departamento, pa un total di mas o menos Afl. 1,8 miyon.

Un compania di Gobierno cu ta haya trabou sin competencia tin un bentaha cu ningun empresa priva no tin. E otro empresanan local no a haya ni e oportunidad di presenta un oferta.

Un consehero sin fin

E consehero ta traha na DIMP desde 2015, prome como auditor y despues como hefe interino. Awor cu DIMP tin un gerente permanente, e ta haya un contracto nobo di dos aña pa conseho, audit, manehamento di proyecto y pa guia e gerente nobo. Esey ta diesun aña sin destaho, y e ta trece un problema serio: e combinacion di conseho y audit. E persona cu a dirigi e departamento pa aña y cu ta duna conseho, awor ta audit e mesun trabou. Un auditor mester ta independiente di loke e ta controla.

Excepcion como regla

Gobierno ta obliga di publica cada excepcion riba www.gobierno.aw. Un bista riba e pagina di destaho ta mustra cuanto biaha esey ta pasa. Di e 75 publicacion entre 25 di mei y 13 di october 2026, 57 ta un decision pa no haci destaho. Esey ta mas o menos tres di cada cuater publicacion. Solamente un diesdos ta destaho publico, y dos di nan a wordo cancela despues.

E ley ta exigi publicacion, y esey ta un bon prome paso: awor tur hende por mira e decisionnan. Pero publicacion no ta reemplasa competencia. Ora tres di cada cuater decision ta un excepcion, e pregunta no ta mas si e reglanan ta bon. E pregunta ta si nan ta wordo aplica.