Gobierno Hulandes tin plan di extende, pa 5 aña mas, e acuerdo cu ta laga Merca usa e partinan di Aruba su Aeropuerto International Reina Beatrix y Corsou su Aeropuerto Internacional Hato pa vuelonan di vigilancia contra narcotico. E extension, confirma den un rapport di Conseho di Exterior Hulandes cu fecha di dia 12 di october, lo core te dia 2 di november 2031, marcando e di 4 biaha cu ta renoba e acuerdo.
E decision ta tumando luga na un momento cu ta politicamente sensitivo. E ta bin mas cu un aña despues di e campaña controversial di Merca contra supuesto barconan di narcotrafico den Caribe y parti oost di Pacifico – un campaña cu a laga por lo menos 238 persona morto, a haya critica for di Nacionnan Uni y a trece dilanti preguntanan directo na Parlamento Hulandes tocante si Aruba y Corsou ta conecta na esaki.
Kico e acuerdo realmente ta cubri
E tratado a cuminsa na maart di aña 2000 y a drenta na vigor den november di aña 2001. E ta permiti aeronavenan militar di Merca usa espacio designa, conoci como Forward Operating Locations (FOL) – na Corsou e instalacion ta yama Cooperative Security Location (CSL) – na ambos aeropuerto pa opera vuelonan di vigilancia cu no ta arma, mira carganan sospecha di trafico di droga y colecta inteligencia o informacion. E facilidadnan aki a existi di algun forma desde 1999, ora cu U.S Defense Department and Customs su aeronave prome a cuminsa opera for di ambos aeropuerto como parti di un red mas amplio di Merca cu tambe tabata inclui un localidad na Ecuador (cera na 2009) y un na El Salvador.
Minister di Exterior Tom Berendsen a bisa cu Hulanda no tin intencion di pone condicion nobo na e renobacion, describiendo Merca como e partner mas importante pa Hulanda y e islanan Caribense den e lucha contra crimen organisa transnacional. E extension te ainda no ta final: bao e Acta di Reino pa Aprobacion y Publicacion di Tratado, gobierno mester formalmente notifica e parlamentonan di Aruba y Corsou di su intencion, despues di cual un cantidad minimo di parlamentario – incluyendo, por ehempel e Minister Plenipotenciario di Corsou – por pidi pa e renobacion pasa door di un procedura di aprobacion parlamentario completo porme.
Prome Minister di Corsou, Gilmar Pisas, anteriormente a expresa sosten pa sigui e cooperacion, argumentando cu e presencia Mericano ta contribui na e isla su seguridad y su lucha contra trafico di droga.
E campaña mortal andando
E acuerdo di FOL mes ta fini y decadanan bieu. Loke a cambia ta e escala di actividad militar di Merca den e region en general. Desde dia 1 di september na 2025, bao e operacion cu Trump su administracion a yama Southern Spear, ehercito Mericano – bao President Donald Trump y Secretario di Defensa e tempo ey Pete Hegseth – a ehecuta decenas di atake letal riba barconan cu nan ta bisa ta traficante di droga, prome den Caribe y despues den parti oost di Pacifico. Desde 12 di october na 2026, tracking independiente di Instituto Naval Mericano su servicio di noticia a pone e cantidad di morto na alrededor di 238 persona den mas di 80 atake aereo, un conteo cu aparentemente ta inclui ciudadanonan di Caribe ademas di ekiponan Venezolano y colombiano cu e administracion a enfatisa publicamente.
E campaña a escala dramaticamente na januari di 2026, ora cu forsanan di Merca a captura President Nicolas Maduro y sac’e for di e pais, despues di varios luna di aumento di presencia naval di Merca, a declara un “conflicto arma” cu cartelnan di droga y operacionnan secreto di CIA dentro di Venezuela cu Trump a autorisa na october di 2025.
E atakenan a haya critica internacional. Rapporteur Special di Nacionnan Uni Ben Saul a argumenta cu e politica por constitui crimen contra humanidad. Amnesty International a describi den varios ocasion cu e asesinatonan ta ehecucion extrahudicial. Colombia y Venezuela a entrega keho formal cu Comision Inter-Americano riba Derechonan Humano, cual a tin audiencia riba e topico na maart di 2026. Na Merca, un hues federal a duna orden na e administracion di Trump pa revela e hustificacion legal pa e atakenan, cual oficialnan te awo a wanta, citando seguridad nacional. E administracion ta mantene cu e botonan ta conecta na gruponan cu Merca a designa como organisacionnan terorista, pero a duna tiki evidencia publico pa atakenan individual.
Esaki ta mishi cu Aruba y Corsou?
Esaki ta e pregunta cu a trece dilanti mas directamente – incluyendo legisladornan Hulandes y gobierno di Hulanda su contesta ta cu no.
Den un debate parlamentario cu a tuma luga dia 9 di december na 2025, dedica specificamente na tensionnn cu tabata aumentando den Caribe y su consecuencia pa Reino, legislador Kati Piri a haci pregunta na e minister di Defensa e tempo aki directamente: vuelonan for di Aruba a contribui di agun manera na e “operacion nacional ilegal” di Merca? Brekelmans a contesta: Het simpele antwoord is nee” – “e contesta simpel ta no.” – El a declara cu e mesun cos ta aplica pa tur facilidad riba e isla, incluyendo aeropuerto di Corsou, y a bisa cu Hulanda no ta permiti uso di su teritorio pa loek e ta considera un operacion completamente nacional pa Merca, separa for di e cooperacion di varios decada contra narcotico. Oficialnan Hulandes tambe a declara den e mesun sesion aki cu un plan anterior pa barconan naval di Merca para y refuel na Corsou, no a tuma luga.
Na mesun tempo, e ministernan a reconoce e limitenan real na loke nan sa realmente. Minister e tempo ey David van Weel a bisa Parlamento cu Hulanda “no tin informacion” cu cual evalua si e atakenan Mericano ta cumpli cu e limitenan di defensa propio, y a bisa cu Washington no a comparti su intencionnan ampliamente den e region cu oficialnan Hulandes – un buraco cu el a describi como “ambiguedad strategico” delibera di banda Mericano. Varios partido Hulandes, incluyendo GroenLinks-PvdA y DENK, a pusha gabinete pa formalmente condena e atakenan como violacion di ley internacional, algo cu gobierno te awo a rechasa di haci, bisando cu e ta prefera laga e asunto cana su caminda via corte y congreso Mericano prome.
Pa Aruba, e acuerdo FOL ta un parti chikito y specifico di un imagen regional mas grandi. E isla ta sinta alrededor di 25 kilometer leu for di Venezuela – suficientemente cerca, legisladornan a nota den debate di december, cu ehercicionan militar di Venezuela pro ser scucha riba Aruba, y suficientemente cerca cu un fast boat di e punto mas cercano di Veenzuela por yega Aruba den bao di 20 minuut. Oficialnan Hulandes ta bisa cu nan no ta mira un menasa militar grave na e islanan actualmente, y a enfatisa cu Aruba su propio facilidadnan na aeropuerto no ta den uso pa sostene e campaña di atakenan letal. Sinembargo e instabilidad aki – un gobierno cu a collapse na Venezuela, operacionnan militar di Merca andando de ne region y e potencial pa migracion of estorbo den suministro – ta keda algo cu oficialnan Hulandes y oficialnan di e isla ta bisa nan ta activamente preparando plannan p’e, te hasta mientras nan ta publicamente mantene cu extende un acuerdo di vigilancia, cu ya tin 26 aña caba, ta un topico completamente separa di e guera cu ta andando na nos bisiña.
