Raad van Advies (RvA) a usa e ocasion di su di 40 aniversario pa duna un evaluacion critico di e progreso di Aruba pa protege derecho fundamental, garantisa certidumbre legal, y mantene bon gobernacion. Maske e pais a haci avancenan importante desde cu a obtene Status Aparte na 1986, RvA ta conclui cu reforma significante ta keda incompleto, y cu gobiernonan sucesivo ripitidamente faya di atende problemanan duradero.

E hallazgonan aki ta presenta den e Jubileumadvies 1986-2026, adopta dia 30 di september y presenta na Gobernador dia 8 di october. E documento ta examina cuatro decada di conseho legislativo mediante e perspectiva di Articulo 43 di Statuut di Reino, cu ta establece e responsabilidad di cada pais pa protege derecho fundamental, certidumbre legal y bon gobernacion.

RvA ta reconoce cu Aruba a desaroya su propio institucionnan y legislacion durante su 40 aña di autonomia. Sinembargo, tambe a identifica un patronchi recurente di reforma atrasa, decisionnan di gobierno insuficientemente hustifica, y legislacion cu ta adopta sin areglo adecuado pa implementacion.

Den un comunicado di prensa, RvA a bisa:
“Durante e ultimo 40 aña, Raad van Advies como consehero independiente a contribui na preparacion di leynan importante cu a yuda Aruba crece den su responsabilidad como pais autonomo. Sinembargo, Raad a mira den e añanan aki tambe diferente proceso cu, pa varios motibo, no a sigui dilanti manera tabata desea.

“Den e ‘Jubileumadvies’ ta reflexiona riba varios temanan di preocupacion cu ta relaciona, directamente of indirectamente cu articulo 43 di Statuut pa Reino Hulandes cu ta un articulo crucial pa realisa y garantisa derechonan y libertadnan fundamental, seguridad huridico y bon gobernacion. Na final ta presenta algun conclusion y recomendacion.”

Organisacion gubernamental y decision politico

Un di e preocupacionnan di RvA ta e manera con ta reorganisa gobierno di Aruba cada biaha cu un gabinete ta asumi poder.

RvA ta observa cu ripitidamente ta redistribui responsabilidadnan ministerial, hopi biaha sin suficiente splicacion pakico mester pone departamento y responsabilidadnan particular hunto. Esaki por resulta den legislacion fragmenta, responsabilidadnan cu ta overlap, y falta di continuidad.

Na 2024, RvA a propone un structura di gobierno mas stabiel cu siete ministerio, argumentando cu un pais chikito lo beneficia di un administracion publico mas eficiente y coherente.

Segun e conseho di aniversario, e recomendacionnan aki no a resulta den un cambio di direccion.

RvA tambe ta critica e creacion continuo di entidadnan di gobierno independiente sin hustificacion adecuado. Den hopi caso, e ta bisa, e necesidad pa establece un organisacion separa tabata insuficientemente demostra, mientras e consecuencia financiero y areglo pa supervision no a haya claridad.

Condicion di prison y derecho humano

E situacion na Instituto Coreccional di Aruba (KIA) ta otro ehempel importante.

RvA ta splica cu esfuersonan pa modernisa legislacion di prison a cuminsa durante e prome añanan di autonomia di Aruba. E Penitentiaire Beginselenverordening a keda adopta na 2005, pero e legislacion necesario y regulacionnan di implementacion discuti den e conseho ainda no a drenta na vigor na 2026.

RvA ta considera e atraso excepcionalmente largo aki como inaceptable, particularmente pasobra prisoneronan ta den un posicion vulnerable y ta depende riba gobierno pa protege nan derechonan fundamental.

E documento ta recorda veredicto y inspeccion internacional identificando fayonan serio den condicionnan di detencion, incluyendo cuido medico inadecuado y trato incompatible cu standard di derecho humano.

RvA ta enfatisa cu legislacion nobo riba su mes no ta bay resolve e problemanan aki. Supervision efectivo, personal cualifica, maneho adecuado y suficiente recurso financiero tambe ta necesario.

Integridad y supervision financiero

E conseho di aniversario tambe ta atende e desaroyo slow di legislacion destina pa reforsa integridad di gobierno y responsabilidad financiero.

RvA ta haci un yamado pa completa legislacion tocante corporate governance y finanzas publico sostenible. Tambe ta recomenda pa introduci legislacion di integridad specificamente pa miembronan di Parlamento y proteccion legal pa klokkenluiders.

Legislacion existente tocante integridad ministerial, partidonan politico y regulacion di salarionan top mester keda evalua y ahusta unda cu ta necesario.

RvA ta observa cu progreso riba legislacion relaciona cu bon gobernacion y supervision financiero hopi biaha ta slow, y den algun caso, influencia pa presion for di pafo di Aruba.

Responsabilidad di Parlamento

E Conseho tambe ta manda critica pa Parlamento.

E ta cuestiona si Parlamento, como institucion, a cumpli suficientemente su responsabilidad di protege derechonan fundamental durante ultimo cuatro decada.

Segun RvA, parlamentarionan individual frecuentemente a tuma iniciativa pa defende e derechonan di gruponan particular, mientras debate parlamentario mas generalmente ta caracterisa pa polarisacion cu ta obstrui progreso.

E Conseho ta argumenta cu respet pa derechonan fundamental mester forma parti di e responsabilidad basico di cada miembro di Parlamento, en bes di depende riba inciativanan politico individual.

E tambe ta mira un rol importante pa Ombudsman, estableci na Aruba na october 2024, den yuda Parlamento monitor si gobierno ta respeta derechonan di ciudadano.

Privacidad y proteccion di ciudadano

RvA tambe ta lanta pregunta tocante proteccion di informacion personal.

Legislacion di Aruba tocante data personal ta bay back na 2011, y segun RvA, ta duna insuficiente supervision. Ciudadanonan mes ta carga hopi di e responsabilidad pa aplica nan derechonan unda nan informacion personal ta procesa inadecuadamente.

E Conseho ta considera modernisacion cada bes mas urgente mientras servicionan di gobierno y negoshi priva ta depende mas y mas riba sistemanan di informacion digital.

Otro asunto sin resolve ta trata legislacion di emergencia. Experiencia di pandemia di Covid-19 a demostra e importancia di tin salvaguardianan legal clave na momento cu gobierno ta restringi derechonan fundamental temporalmente.

E Conseho ta nota cu e marco legislativo neceario pa cierto emergencia prolonga ta keda incompleto.

Autonomia ta rekeri responsabilidad

E conseho di aniversario ta conclui cu Aruba ta keda principalmente responsable pa protege e derechonan di tur hende dentro di su teritorio, y sigura cu su gobierno ta funciona legalmente y adecuadametne.

na mes momento, e Conseho ta enfatisa cu Reino Hulandes tin un responsabilidad pa salvaguardia e principionan aki bao di Articulo 43 di Statuut.

RvA ta reconoce cu su propio influencia tin limite. Gobierno y Parlamento no semper ta obliga di sigui su recomendacionnan, y e Conseho no por, riba su mes, obliga nan pa implementa reforma.

Asina mes, e ta argumenta cu madurez democratico ta rekeri e disponibilidad pa reconoce deficiencia y tuma responsabilidad pa corigi esakinan.

E Conseho ta clausura su reflexion di aniversario expresando speransa cu, ora Aruba celebra su 50 aña di autonomia, e decada precedente ta bay ser recorda pa progreso significante den protege derechonan fundamental, reforsa certidumbre legal, y mehora e calidad di gobierno.