Un disputa entre Aruba Bucuti Beach Hotel N.V. y Gobierno di Aruba tocante uzo di tereno publico na Eagle Beach a resulta den un sentencia nobo di Corte di Prome Instancia. Gobierno a haya orden pa tuma decision riba seis obhecion di e hotel, despues cu no a cumpli cu un sentencia anterior di juni 2025. Si gobierno no cumpli cu e termino nobo, e por enfrenta un multa di Afl. 500 pa dia, cu un maximo di Afl. 25.000. E sentencia mas reciente, di september 2026, a ser publica dia 16 di october.
E caso tin su origen den un diferencia di opinion tocante cantidad di stoel di beach y parasol cu Bucuti Beach Hotel por pone riba un parti di Eagle Beach cu ta tereno publico. E hotel a pidi permiso pa ocupa 600 meter cuadra di tereno publico pa pone 200 stoel di beach y 100 parasol. Sinembargo, gobierno a limita e permiso na 180 meter cuadra, cu un maximo di 60 stoel y 30 parasol. Esaki a resulta den varios procedemento administrativo, cu na final a yega dilanti di Corte.
Segun e sentencia original di 18 di juni 2025, Bucuti ta opera un hotel na Eagle Beach desde 1975. E hotel tin un parti di beach den erfpacht, unda e por pone stoel sin mester pidi un permiso adicional pa ocupa tereno di gobierno.
Sinembargo, Bucuti tambe kier ofrece su huespednan stoel y parasol riba un otro parti di beach cu no ta inclui den su tereno di erfpacht. Pa uza e espacio publico aki comercialmente, e hotel mester pidi di un permiso di precario, conforme na e regulacionnan di gobierno.
Den pasado, e hotel tabata pone stoel y parasol riba e parti aki di beach sin cu un permiso di precario tabata necesario. Cu introduccion di e maneho ‘Beach Policy’, e situacion a cambia y empresanan cu ta uza tereno publico pa ofrece facilidadnan comercial mester pidi permiso.
Pa añanan 2016, 2017 y 2018, e hotel a pidi permiso pa pone 200 stoel y 100 parasol riba 600 metro cuadra. Gobierno a duna permiso pa 60 stoel y 100 parasol riba 180 meter cuadra.
Despues Bucuti a pidi permiso pa e añanan 2019 te 2023, cu e mesun cantidad di 200 stoel y 100 parasol. Dia 4 di maart 2024, gobierno a duna cinco permiso, un pa cada aña, pero a limita e cantidad na 60 stoel y 30 parasol riba 180 meter cuadra.
E hotel no tabata di acuerdo cu e limitacionnan y a presenta obhecion contra e decisionnan. Dia 29 di october 2024, gobierno a declara e obhecionnan di e hotel infunda.
Un di seis disputa tabata relaciona cu e solicitud pa aña 2024. Tambe den e caso aki, gobierno a permiti solamente 60 stoel y 30 parasol, mientras cu Bucuti a pidi un cantidad mas grandi.
Como resultado, e hotel a acudi na Corte cu seis caso administrativo. Den su sentencia di 18 di juni 2025, Corte di Prome Instancia a analisa con gobierno a aplica e regulacionnan di Beach Policy y si e limitacionnan imponi na Bucuti tabata suficientemente fundamenta.
Gobierno a defende su posicion indicando cu e maneho di beach ta establece condicion pa uzo comercial di espacio publico. E regulacionnan ta contempla, entre otro, cantidad di permiso comercial pa cada seccion di beach y e superficie disponibel pa pone facilidadnan.
Gobierno tambe a splica cu anteriormente tabatin un fout door di permiti 100 parasol pa 60 stoel. Segun e interpretacion aplica door di gobierno, e proporcion corecto ta un parasol pa cada dos stoel, door di cual e cantidad a ser reduci na 30 parasol den e permisonan posterior.
Sinembargo, Corte a determina cu gobierno no a splica suficientemente con e regulacionnan aki ta hiba specificamente na un maximo di 60 stoel y 30 parasol pa Bucuti.
Segun Corte, e decisionnan no tabata suficientemente prepara ni motiva. Gobierno mester a presenta un calculacion cla di e superficie cu por ser uza, cantidad di espacio necesario pa cada stoel, distancia entre parasol y e manera cu e condicionnan di Beach Policy ta ser aplica.
Hues tambe a considera necesario pa gobierno evalua circunstancianan particular di e hotel.
Un di e puntonan menciona tabata e uzo historico di e beach. Bucuti a splica cu desde 1975 e ta uza e espacio pa pone un cantidad mas grandi di stoel y parasol cu loke actualmente ta permiti. Segun Corte, no tin indicacion cu e uzo aki di beach a afecta orden publico ni seguridad.
Otro aspecto tabata e comparacion cu hotelnan den cercania. Corte a observa cu e situacion geografico di e hotelnan ta comparabel den relacion cu e espacio liber entre e seccion destina pa stoel y e liña di costa.
Den caso di otro hotel den cercania, Corte a menciona presencia di por lo menos 100 palapa, cu tin un impacto mas grandi cu e parasolnan solicita door di Bucuti. Esaki a lanta pregunta tocante pakico gobierno a limita e cantidad di parasol pa Bucuti na solamente 30 parasol.
Corte no a determina cu Bucuti automaticamente tin derecho riba e 200 stoel y 100 parasol cu el a pidi. E conclusion tabata cu gobierno mester motiva su decision debidamente y evalua si circunstancianan particular ta hustifica un excepcion di e maneho general.
Pa e motibonan aki, Corte a declara e obhecionnan funda, a anula e decisionnan di 29 di october 2024 y a ordena gobierno pa tuma decision nobo riba e obhecion di Bucuti den un termino di tres luna.
E sentencia di juni 2025 tabata obliga e minister responsabel pa reconsidera e caso y tuma decision nobo dentro di e termino estableci.
Sinembargo, segun e sentencia mas reciente, gobierno no a cumpli cu e obligacion aki.
Debi na ausencia di decision, Bucuti Beach Hotel a presenta un peticion nobo na Corte dia 8 di januari 2026, basando su solicitud riba articulo 53 di Landsverordening administratieve rechtspraak, conoci como Lar.
Cu e peticion aki, e hotel a solicita Corte pa obliga gobierno cumpli cu e sentencia anterior, incluyendo imposicion di un boet si e no tuma un decision.
Corte a constata cu e minister ainda no a tuma decision riba e obhecionnan, a pesar cu e tabata obliga pa haci esaki desde e sentencia di juni 2025.
Hues a determina cu gobierno no a ehecuta e sentencia anterior y cu tabata necesario pa impone un obligacion nobo, e biaha aki compaña cu un boet pa incumplimento.
Den su sentencia di 9 di september 2026, Corte di Prome Instancia a ordena e minister pa tuma decision riba tur seis obhecion di Bucuti dentro di dos luna despues di fecha di e sentencia. Si gobierno no cumpli cu e termino aki, e minister lo mester paga un boet di Afl. 500 pa cada dia di atraso, te un maximo di Afl. 25.000.
E boet no ta un pago cu gobierno mester haci automaticamente como resultado di e sentencia. E ta aplica solamente si e minister no tuma decision riba e obhecionnan dentro di e termino estableci.
Ademas, Corte a condena gobierno pa paga Afl. 175 na gasto di asistencia huridico di Bucuti den e procedemento mas reciente.
E disputa entre Bucuti y gobierno ta toca un tema mas amplio tocante regulacion di actividad comercial riba beachnan publico di Aruba. E Beach Policy ta regula, entre otro, con empresario por ofrece stoel y parasol na beach y cua espacio por ser ocupa pa e actividadnan aki.
Den e sentencia original, Corte a haci distincion entre permiso pa ofrece stoel comercialmente y derecho di ciudadano pa uza beach publico. E existencia di un permiso comercial no ta elimina e derecho di otro persona pa bishita e beach y uza su propio stoel.
E caso di Bucuti ta enfoca principalmente riba e manera con gobierno a aplica e regulacionnan na un peticion specifico y si e limitacionnan imponi tabata suficientemente fundamenta. Hues a exigi un evaluacion mas completo y un motivacion claro di e decision di gobierno.
E caso ta pone enfasis riba importancia di un maneho transparente y decisionnan gubernamental debidamente fundamenta. Mientras tanto, ainda ta pendiente pa determina cuanto espacio publico Bucuti finalmente por uza pa su actividadnan comercial na Eagle Beach.
