(AFP) – Rusia ta habri pa sigui dialogo trilateral cu Washington y Kyiv den direccion di yega e fin di e guera, e Kremlin a bisa despues cu Vladimir Putin a reuni cu enviado special di Merca Steve Witkoff diaranson, sinembargo a bisa cu tin “tiki substancia” den e strategianan nobo Ucraniano y Europeo.
Moscu tambe a bisa un cumbre entre Putin, President Donald Trump y China su Xi Jinping ta bao preparacion na China pa proximo luna, yamando e “e prome reunion di su tipo den historia.”
Putin a tene dialogo di casi 3 ora cu Witkoff na St. Petersburg, un dia despues di loke e oficial Mericano a yama un reunion “productivo” cu Ucrania su Volodymyr Zelensky na Noruega.
Witkoff a bisa riba rednan social despues cu e dialogo tabata “constructivo” pero cu te ainda “tin trabao importante pa haci” y dialogo lo sigui entre Merca, Ucrania y Rusia na nivel tecnico.
Mientras Witkoff a yega Rusia, Moscu a libera un ciudadano Mericano – Stephen Hubbard – y a bisa cu pronto lo cuminsa cu cargamento di diesel pa Merca.
Casa di yiu di Trump Jared Kushner tambe a tuma arti den dialogo cu Putin di manera remoto.
Mas di 1 aña di dialogo lidera pa Merca caba e guera na Ucrania – lansa pa Moscu na 2022 – te ainda no a duna resultado, cu dies miles persona morto.
Ayudante di Kremlin Yuri Ushakov a bisa reporteronan, incluyendo AFP, cu Witkoff a informa Putin tocante “algun aspecto nobo den e strategia di Europeonan y Kyiv” for di e reunion na Oslo, agregando cu “no tabatin hopi substancia den nan.”
Putin a consistentemente rechasa dialogo personal cu Zelensky y a insisti cu Moscu tin intencion di tuma control di e resto di parti oost di Ucrania.
‘Ideanan’ pa un acuerdo di paz
Ushakov a bisa cu e prome reunion “China-Merca-Russia” ta “den preparacion” na China, sin bisa kico e lidernan lo trata.
Kyiv y su aliadonan Europeo a expresa miedo cu e Cas Blanco por yega un acuerdo riba nan cabes. “Mi semper a bisa cu nos ta habri pa negocia den cualkier formato, cualkier topico. Pro no papia di nos, sin nos por fabor,” Zelensky a bisa Fox News diaranson.
Witkoff a tene su di 9 reunion cu Putin mientras Rusia ta sigui cu atake riba ciudadnan di Ucrania prome cu winter y den medio di un discusion amargo entre Trump y Zelensky.
“Nos a trece algun papel. E ta realmente algun idea, algun ta un sorto di acuerdo di paz entre Rusia y Ucrania, y bo lo sa esey na bo comodidad,” Witkoff a bisa Putin na Saint Petersburg su Palacio Konstantinovsky prome cu e dialogo.
E enviado di Merca a bisa cu e tabata kier dialogo trilateral pa caba, algo cu Kremlin a bisa despues cu e ta acepta. Ushakov a bisa cu e dialogo lo bolbe habri na mita di november y cu e Kremlin kier pa nan enfoca riba seguridad despues di guera.
Mientras Witkoff tabata yega Saint Petersburg, Kyiv a bisa cu atakenan Ruso a mata por lo menos 4 persona – incluyendo dos den e capital y un pareha di edad mayor den e region Kharkiv.
Ocupacion di autoridadnan Ruso den e region Lugansk, mientrastanto, a bisa cu atake di drone na Ucrania riba un compania di telefon a mata dos persona.
Witkoff a bisa Putin cu el a mira “un cirto grado di momentum” den e prome dialogo lidera pa Merca despues di reuni cu Zelensky.
Zelensky a bisa cu e ta wardando pa tende “si e banda Mericano logra tende algo nobo di Rusia awe.”
E reunion entre Witkoff y Zelensky lo sigui dianan di friccion entre Washington y Kyiv, y yamadonan di Trump pa e lider di Ucrania keda reemplasa.
Witkoff tambe a bisa Putin cu Washington ta “gradici” pa un acuerdo cu diesel, cual a mira sancion di Merca riba Moscu alivia pa permiti petroleo Ruso dentra Merca, causando disgusto na Kyiv y Europa.
E acuerdo ta ser mira como un manera pa purba baha prijs di petroleo pa consumidornan Mericano, mientras Trump su partido Republicano ta dirigi den direccion di leccion medio termino proximo luna.
Washington tabata interesa den mas “cooperacion den negoshi y economico” cu Rusia ora cu e guera caba, Witkoff a bisa.
“Nos ta te hasta papia di esaki abiertamente cu Ucranianonan pa duna nan algun tipo di sentido tocante cua e posibilidadnan lo ta ora cu henter e conflicto aki caba,” el a bisa.
Kyiv a pidi e paisnan Occidental pone mas presion riba Moscu y no kita sancionnan.
Prome cu e dialogo, Putin a anuncia cu Stephen Hubbard, un Mericano cu forsanan Ruso a captura na Ucrania na 2022 y despues a sentencia na casi 7 aña den prison, a ser laga den libertad.
Trump a pidi e lider Ruso pa libera Hubbard, un docente di Ingles retira cu semper a rechasa e cargonan cu e tabata un “mercenario” luchando pa Ucrania.
