(AFP) – Meta y su plataformanan di social media Facebook y Instagram ta enfrenta un demanda colectivo na Australia pa acusacionnan cu funcionnan di diseño cu ta crea adiccion ta causando daño na muchanan y adolescentenan.
E demanda, presenta na Corte Federal na nomber di ocho solicitante, ta busca compensacion pa usuarionan di Facebook y Instagram cu a keda exponi na contenido dañino of cu a desaroya adiccion na social media, segun un declaracion di firma legal Minter Ellison y Litigation Lending.
Corte Federal na Sydney a emiti dialuna un orden pa prohibi publicacion di detaye di e caso y identidad di e solicitantenan, segun documentonan hudicial.
“Nos ta consciente di e demanda aki y nos lo defende nos mes energicamente,” un vocero di Meta a bisa den un declaracion.
Litigation Lending Services a bisa cu e ta financia e demanda colectivo pa famianan Australiano cu “no lo tin un manera practico pa sigui e tipo di demandanan aki contra un gigante tecnologico global”.
“E proceso aki ta lanta preguntanan importante tocante diseño y funcionamento di plataformanan di social media y nan impacto riba muchanan y adolescentenan na Australia,” socio di Minter Ellison William Nolan a bisa den un declaracion.
Na augustus, Meta a acepta paga te USD 17,7 biyon na Merca pa resolve demandanan cu tabata alega cu e compania deliberadamente a diseña su plataformanan pa haci usuarionan hoben bira dependiente di nan.
