Diahuebs mainta trempan a tuma nota di dos tribon ta landando hopi cerca di oriya na Palm Beach, causando preocupacionnan entre usuarionan di e beach. E noticia aki a surgi den medio noticiero online unda a reporta cu usuarionan a ser conseha di sali for di awa pa asina evita peliger.
Segun informacion online, tabata dos trahador di hotel cu a ripara e dos tribon diahuebs mainta den cercania di Hyatt y Playa Linda. Mesora a bati alarma na Cuerpo Policial, cual a desplega strandpolitie pa controla e situacion. Na mesun momento, KPA a tuma contacto cu Aruba Marine Mammal Foundation (AMMF), cual a manda dos boluntario na e sitio, segun AMMF ta confirma cerca Bon Dia Aruba.
E fundacion a conta nos cu pa ora e dos boluntario a yega na e sitio, ya e tribonnan a aleha for di oriya. Segun presidente di e fundacion ta splica nos, aki tabata trata di dos tribon chikito cu tabata keiro den zona di landa na Palm Beach, pero no por a logra identifica ki especie di tribon e dosnan tabata.
Manera a splica, de vez en cuando tribonnan ta landa cerca di nos oriyanan, y aunke tin especie di tribon cu no ta presenta peliger pa hende, algun especie por ta peligroso specialmente si ser provoca of molestia.
E fundacion a afirma cu e boluntarionan a papia cu personal y security guard di e hotel den cercania, y a nota cu nan mes a tuma accion responsabel pa seguridad di usuarionan y e tribonnan, manteniendo tur hende calmo y den distancia di e animalnan. “E ta un bon ehempel con pa anda responsablemente den un situacion asina”, presidente di AMMF Sra. Angiolina Henriquez a enfatisa cerca Bon Dia Aruba.
Tribon normalmente ta ser considera como menasa pa mamifero marino, specialmente pa delfinnan baby. Sinembargo, e fundacion a splica cu pasobra tribonnan tambe ta enfrenta menasa di extincion—en particular algun especie protegi pa ley—e animalnan aki ta cay bao interes di e fundacion.
