(AFP)—Mester declara cambio climatico como un “emergencia pa salud global” pa influencia politicanan di gobierno, despues cu calor a causa tres miyon morto entre 2016 y 2023, segun un rapport publica diaranson den revista medico The Lancet.
Publica pa e revista medico Britanico prome cu e conferencia climatico COP31 na november, e di dies edicion di e rapport a reuni 146 investigador for di 30 pais pa evalua e impacto di cambio climatico riba salud di poblacion mundial.
E rapport a indica cu na 2023 a registra un cantidad record di 710,000 morto relaciona cu calor, cu mas di 70 porciento di e cantidad ey ta relaciona cu cambio climatico causa pa actividad humano.
Marina Romanello, director ehecutivo di e proyecto di investigacion tocante salud y clima Lancet Countdown, a declara cu tabatin “tres miyon morto relaciona cu calor mundialmente den un periodo di ocho aña desde Acuerdo di Paris” di 2015.
“Esaki ta aproximadamente ekivalente na henter e poblacion di Gales cu a ser elimina den un periodo di ocho aña debi na calor,” el a declara durante un conferencia di prensa.
Y “68 porciento di e mortonan ey por ta atribui directamente na cambio climatico”.
E tratado internacional legalmente obligatorio tocante clima, adopta den capital Frances, tabatin como obhetivo limita calentamento global na menos cu 2 grado Celsius y sigui haci esfuerso pa manten’e na 1.5 grado Celsius compara cu nivelnan prome cu industrialisacion.
Impacto di cambio climatico
Romanello a declara cu e emergencia mundial di salud causa pa cambio climatico mester ser maneha cu “un strategia integra, pa asina nos no ta reaccionando na un emergencia tras di otro”.
En bes di esey, el a boga pa “un reaccion coherente y duradero cu ta fortalece resistencia, aumenta capacidadnan y amplia e posibilidadnan di paisnan pa evita mas emergencia den futuro”.
Pa determina e proporcion di morto cu por keda atribui na calentamento causa pa actividad humano, e investigadornan a compila e cantidad di morto relaciona cu calor registra pa e paisnan y despues a kita e mortonan cu lo a sucede sin cambio climatico, segun profesor Ollie Jay di Universidad di Sydney.
Jay a declara cu cambio climatico ta aumenta tanto e intensidad como frecuencia di periodonan di calor extremo. El a señala cu aña pasa un secura extremo a afecta mas di mita di superficie terestre di mundo durante por lo menos un luna.
Costo economico
Door di reduci productividad di trahadornan, calentamento global a costa economia mundial mas di un triyon dollar pa aña durante e ultimo tres aña, segun e investigadornan.
Ta calcula cu Zuidoost Asia y Africa, e regionnan mas afecta, a perde e ekivalente di 3.9 porciento y 3.2 porciento di nan producto interno bruto (GDP), compara cu 0.2 porciento pa Europa y 1.5 porciento pa continente Americano.
Sinembargo, a registra progreso concreto den algun area.
Desde 2016, 56 di e 194 estado miembro di Organisacion Mundial di Salud (WHO) a adapta nan sistemanan di salud y alerta tempran pa anticipa eventonan extremo.
Inversion den energia limpi a yega 2.1 triyon dollar na 2025, dobel di e cantidad inverti den combustibelnan fosil, cual ta causa cambio climatico.
Sinembargo, combustibelnan fosil ainda ta representa 80 porciento di energia mundial y ta causa contaminacion di aire cu ta resulta den 2.73 miyon morto pa aña, segun e estudio.
Mientras tanto, a evita aproximadamente 323,000 morto den “por lo menos” 77 pais unda contaminacion di aire causa pa combustibelnan fosil a baha desde 2016, segun e rapport.
Aunke financiamento pa investigacion medico relaciona cu clima a aumenta shete biaha y a yega 316 miyon dollar na 2024, 84 porciento di e fondonan aki ta bay pa investigadornan den paisnan rico, a pesar cu e paisnan menos desaroya ta esnan mas afecta pa e menasanan creciente di cambio climatico pa salud.
Romanello a declara cu, pa prome biaha e aña aki, e trabou di e investigadornan a bira mas complica debi na desaparicion di cierto fuente di dato, particularmente for di Merca. Entre nan tin informacion tocante subsidionan pa combustibelnan fosil, cu autoridadnan Mericano no a publica.
Tambe el a declara cu durante e ultimo dos aña, instabilidad geopolitico mundial a pusha calentamento global y su impacto riba salud patras, subrayando cu falta di accion ta empeorando e situacion.
