E produccion cultural y educativo “Den Nos Bario”, presenta pa Siomara Everon, ta continua su recorido door di Aruba cu tres episodio nobo dedica na districto di Noord. E prome episodio lo sali diabierna 6 di november 2026, pa 7’or di anochi, via TeleAruba, y despues lo ta disponibel tambe riba YouTube. E serie ta invita pueblo di Aruba pa descubri historianan poco conoci, tradicionnan y personahenan cu a contribui na desaroyo di Noord.

“Den Nos Bario” ta un produccion cu durante tres aña caba ta documentando historia social, economico y cultural di diferente districtonan di Aruba. E proyecto a cuminsa na San Nicolas y awor a yega na Noord, caminda e ekipo a prepara tres episodio cu ta enfoca riba e hende, tradicion, cultura y desaroyo di e districto.

Segun Siomara Everon, e intencion ta pa presenta historia di Aruba den un manera accesibel, interesante y autentico, dunando espacio na e personahenan cu conoce e barionan y cu por comparti nan recuerdo y experiencianan.

Un parti importante di e produccion ta e documentacion di historia oral. Esaki ta trata di historianan cu a pasa di generacion pa generacion, conta pa hendenan cu a presencia acontecimentonan importante of cu a tende nan mayornan conta di e pasado.

Everon ta enfatisa cu si no registra e historianan aki, tin riesgo cu nan por perde pa semper. P’esey, e documentarionan no ta solamente entretenimento, sino tambe un contribucion importante na conservacion di herencia cultural di Aruba.

Historianan di Noord cu hopi hende no conoce

Den e tres episodionan dedica na Noord, e publico lo descubri algun aspecto sorprendente di e historia di e districto.

Un ehempel cu Everon ta menciona ta e existencia di posnan di awa dushi den cercania di costa di Noord. Segun e historia, den pasado tabatin un boca caminda botonan por a drenta pa busca awa dushi. E posnan aki tabata importante pa e hendenan cu tabata depende di lama pa nan sobrevivi.

Awendia, e lugarnan aki a cambia y e posnan a wordo tapa, pero nan historia ta mustra con importante acceso na awa tabata pa bida diario di nos antepasadonan.

Otro historia cu lo haya atencion ta esun di Pedro Matacuatro, un personahenan di Noord relaciona cu un tragedia cu, segun Everon, ainda ta provoca emocion cerca di hendenan cu conoce e acontecimento.

Ken tabata Pedro Matacuatro y kico a sosode? E produccion ta invita publico pa descubri e historia durante e episodionan nobo.

Un produccion pa enseñansa y conservacion cultural

E proyecto ta conta cu sosten di UNOCA, cu a contribui pa haci posibel e documentacion y conservacion di historia, cultura, tradicion y celebracionnan di Aruba.

Pa e investigacion historico, e ekipo ta coopera cu Museo Arqueologico, Archivo Nacional, Biblioteca Nacional, antropologonan, historiadornan y naturalmente residentenan y personahenan emblematico di cada districto.

E produccion ta incorpora tambe inteligencia artificial pa duna bida nobo na potretnan y documentonan antiguo, y pa recrea algun escenario historico. Di e manera aki, e audiencia por haya un impresion visual di con bida tabata den pasado.

Everon ta spera cu e material documenta por sirbi tambe como recurso educativo den scolnan, especialmente pa enseñansa di historia di Aruba.

Historia di Aruba tambe pa nos bishitantenan

Cu colaboracion di Aruba Tourism Authority (ATA), e produccionnan lo haya subtitulo na Ingles, pa asina turistanan tambe por conoce mas di historia y cultura di Aruba.

E intencion ta pa e documentarionan bira accesibel tambe den hotelnan y aeropuerto, creando un oportunidad pa bishitantenan descubri e Aruba autentico, mas aya di nos playanan y atraccionnan turistico.

“Den Nos Bario” ta invita henter pueblo di Aruba pa sintonia diabierna 6 di november, pa 7’or di anochi, riba TeleAruba, pa disfruta di e prome episodio dedica na Noord.

E episodionan lo por wordo mira tambe riba YouTube, buscando “Den Nos Bario”, caminda e publico por disfruta igualmente di e produccionnan anterior.

Un invitacion pa conoce nos pasado, aprecia nos tradicionnan y conserva nos historia pa generacionnan futuro.