(NLTimes) – Prijs promedio di combustibel na stacionnan di gas na Hulanda a sigui baha. Como resultado di e bahada reciente den prijs di petroleo, costo di gasolin ya a cay bao di €2,50 diahuebs, e nivel mas abao desde juli.
Segun cifranan di plataforma pa spaarmento di consumidor UnitedConsumers, prijs recomenda pa un liter di gasolin Euro 95 tabata €2,457 diasabra, 0,6 cen menos cu diabierna.
Dia 10 di october, gasolin a yega na su prijs mas halto te awo, cu un prijs recomenda promedio di €2,732.
Un liter di diesel actualmente ta costa un promedio di €2,60, loke ta 1,2 cen mas barata cu e dia anterior.
UnitedConsumers ta sigui diariamente prijsnan recomenda di e companianan grandi di petroleo y ta calcula un promedio.
Normalmente, e prijsnan ey ta ser cobra solamente na stacionnan di gas na banda di snelweg; na otro luganan, combustibel frecuentemente por ser cumpra mas barata.
Prijsnan di combustibel na Hulanda ainda ta considerablemente mas halto cu prome cu guera na Iran a cuminsa na final di februari.
E momento ey, prijs recomenda pa Euro 95 ainda tabata €2,285. Un liter di diesel tabata costa €2,084 prome cu guera a cuminsa.
Prijsnan mundial di petroleo a subi fuertemente pa motibo di guera. Esaki ta principalmente relaciona cu ciere di Estrecho di Hormuz, unda aproximadamente 20% di comercio mundial di petroleo tabata pasa prome cu conflicto na Medio Oriente.
Como resultado, automobilistanan ta paga considerablemente mas na pomp pa algun tempo caba.
Sinembargo, mas tempran e siman aki, prijsnan di petroleo a baha algo memey di speransa pa un solucion diplomatico pa guera na Medio Oriente.
