Segun un documento oficial di Tijdelijke Werkorganisatie (TWO), publica na februari 2026, aproximadamente 11% di poblacion di Aruba tin diabetes. Investigacionnan di salud ta señala cu obesidad y falta di actividad fisico ta representa factornan importante di riesgo. Den cuadro di Dia Mundial di Diabetes dia 14 di november, e cifranan ta subraya importancia di prevencion, deteccion trempan y cuido medico adecua.

Dia Mundial di Diabetes ta un iniciativa internacional cu tin como meta aumenta conocemento tocante diabetes, su consecuencianan y importancia di tratamento adecua. E conmemoracion ta brinda oportunidad pa evalua e situacion na Aruba, particularmente considerando e cantidad di residente cu ta biba cu e malesa y e presion cu condicionnan cronico ta eherce riba e sistema di salud.

Un documento oficial publica dia 19 di februari 2026 door di TWO, relaciona cu implementacion di cuido multidisciplinario pa pashentnan cu diabetes, ta indica cu 11% di poblacion di Aruba tin diabetes mellitus. E documento ta identifica e malesa manera e causa principal di morto na e isla. Sinembargo, e publicacion no ta specifica e aña exacto di e midimento riba cual e cifra ta basa.

Diabetes por provoca complicacionnan serio, incluyendo malesanan di curason, problema cu circulacion di sanger, perdida di bista, daño na riñon y amputacion di pia. E complicacionnan aki por afecta calidad di bida di pashentnan y aumenta necesidad di tratamento specialisa y cuido continuo.

Otro fuente importante ta e investigacion nacional STEPS 2023, realisa door di Directie Volksgezondheid (DVG), Central Bureau of Statistics (CBS) y Organisacion Panamericano di Salud (PAHO). E estudio, publica na 2024, a inclui 2.744 adulto entre 18 y 69 aña y a examina diferente factor di riesgo relaciona cu malesanan cronico.

Segun e investigacion, 10.2% di adultonan den e grupo di edad aki tabatin un nivel halto di sucu den sanger durante midimento of tabata uzando medicamento pa diabetes. E porcentahe tabata 10.1% entre hende homber y 10.3% entre hende muhe. Ademas, 14% di e adultonan examina tabatin un nivel di sucu den sanger mas halto cu normal despues di un periodo sin come, locual por indica un riesgo aumenta pa desaroya diabetes.

E cifranan di STEPS y e documento di TWO no por ser compara directamente, pasobra nan ta basa riba diferente grupo di poblacion y metodologia. P’esey, e diferencia entre e porcentahenan no ta suficiente pa determina si diabetes a aumenta of baha durante ultimo añanan.

Mientras tanto, International Diabetes Federation (IDF) a calcula den su Diabetes Atlas 2025 cu Aruba tabatin aproximadamente 4.200 adulto cu diabetes den 2024. E calculacion ta cubri personanan entre 20 y 79 aña, cu un prevalencia di 5.2%. E organisacion ta calcula ademas cu aproximadamente 22.5% di e personanan cu diabetes den e grupo aki no tabata diagnostica. E cifranan ta basa riba calculacionnan internacional y ta diferente di e resultadonan di investigacion local.

Un di e factornan di riesgo mas importante pa diabetes tipo 2 ta obesidad. E investigacion STEPS 2023 a revela cu 46% di adultonan na Aruba tabatin obesidad, mientras cu otro 33% tabatin sobrepeso. Esaki ta nifica cu aproximadamente ocho di cada dies adulto den e grupo investiga tabatin un peso mas halto cu e nivel considera saludabel.

E situacion entre muchanan tambe ta genera preocupacion. Segun informacion presenta door di DVG na november 2025, 42,7% di muchanan entre 5 y 12 aña na Aruba tabatin sobrepeso of obesidad. Aunke esaki no ta nifica cu e muchanan tin diabetes, sobrepeso durante infancia por aumenta e riesgo di desaroya diabetes tipo 2 durante bida adulto.

Actividad fisico ta otro aspecto importante den prevencion. E estudio STEPS a identifica cu 23.6% di adultonan entre 18 y 69 aña no tabata cumpli cu e recomendacionnan internacional pa actividad fisico. E porcentahe tabata 27.8% entre hende muhe, compara cu 17.8% entre hende homber. Den e grupo di 60 te 69 aña, aproximadamente un di cada tres persona no tabata haci suficiente actividad fisico.

Diabetes tipo 2 por desaroya poco poco, sin cu un persona ripara e sintomanan. Sinembargo, algun persona por experimenta sed excesivo, neceesidad pa pishi frecuentemente, cansancio y perdida di peso sin un motibo cla. Control regular di sucu den sanger por yuda descubri e malesa na tempo y preveni complicacionnan serio.

E investigacion STEPS a revela tambe limitacionnan den siguimento medico. Entre personanan cu anteriormente a ricibi un diagnostico di diabetes, aproximadamente 61% a haci por lo menos dos test di HbA1c durante e aña anterior. E test aki ta permiti evalua e nivel promedio di sucu den sanger durante aproximadamente tres luna.

Sinembargo, solamente 47% di e pashentnan diagnostica a indica cu nan a haci un control di wowo durante e dos añanan anterior, mientras cu 38% a ricibi un examinacion di pia durante e ultimo aña. E resultadonan ta importante, considerando cu diabetes por causa daño na nervionan, circulacion di sanger y bista si e malesa no ta suficientemente controla.

Den februari 2026, TWO a identifica diferente desafio den organisacion di cuido pa pashentnan cu diabetes na Aruba. Entre esakinan tin falta di comunicacion entre cuido medico primario y specialisa, fragmentacion di servicionan y distribucion desigual di profesionalnan di salud. E situacion aki por afecta eficiencia di tratamento y contribui na gastonan halto pa sistema di salud.

Pa atende e desafionan aki, e plan ta concentra riba implementacion di cuido multidisciplinario, den cual diferente profesional di salud por colabora den tratamento y siguimento di pashentnan. E meta ta mehora coordinacion entre dokter di cas, specialistanan y otro profesionalnan, pa asina fortalece control di diabetes y reduci complicacionnan.

Na november 2025, DVG a lansa e campaña Eet Goed, Betaal Minder den cuadro di Dia Mundial di Diabetes. E iniciativa ta promove alimentacion saludabel y accesibel, cu atencion special pa reduccion di bebida cu hopi sucu y consumo di productonan di cuminsa altamente procesa.

E esfuersonan aki ta forma parti di e Plan Nacional Multisectorial 2020–2030, cu ta busca reduci factornan di riesgo, promove habito saludabel y fortalece prevencion di malesanan cronico na Aruba.

Den cuadro di Dia Mundial di Diabetes 2026, e informacion disponible ta mustra importancia di mantene atencion riba prevencion, deteccion trempan y siguimento medico. E diferencia entre calculacionnan internacional y resultadonan local ta demostra tambe necesidad di informacion actualisa y comparable pa evalua e desaroyo di diabetes na Aruba.

E desafio pa Aruba ta consisti den fortalece prevencion, mehora acceso na tratamento y garantisa siguimento medico adecua, cu e meta di reduci complicacionnan y mehora calidad di bida di personanan cu ta biba cu diabetes.