Minister di Finanzas, Asunto Economico y Sector Primario, mr. Geoffrey Wever ta anuncia cu entrante 11 di november 2026 prijs di gasolin y prijs pa diesel ta conoce un bahada. Prijs di gasolin lo bira Afl. 2,945 pa liter cu ta igual na un bahada di 17,9 cen pa liter y prijs di diesel lo bira Afl. 3,362 cu ta un bahada di 1,4 cen pa liter. Prijs di kerosin lo bira Afl.3, 186 pa liter, un subida di 6,7 cen.
Dos factor ta determinante den e bahada aki. Prijsnan internacional pa e luna di october, cu ta forma e base pa determina e prijs den november ta mustra un bahada. Pa gasolin e prijs averahe ta baha di Afl. 1,802 pa Afl. 1,647, un bahada di 15,5 cen pa liter. Decision di Gabinete AVP-FUTURO pa mantene e accijns na 58,2 cen pa liter tambe ta duna un contribucion extra na e bahada aki. Pa diesel e prijs averahe ta baha di Afl. 2,326 pa Afl. 2,315, un bahada di 1,1 cen pa liter. Decision di Gabinete AVP-FUTURO pa mantene e accijns na 30,0 cen pa liter di diesel tambe ta duna un contribucion extra na e bahada aki. Pa determina e prijsnan di gasolin y diesel, desde 1 di mei 2025 e bahada di accijns cu 10 cen pa liter ainda ta vigente y asina contribui tambe na e bahada.
Incertidumbre riba e futuro desaroyo di e guera entre Merca y Iran ta traduci su mes den un desaroyo di prijs volatil. P’esey Ministerio di Finanzas, Asunto Economico y Sector Primario ta monitorea e situacion geopolitico. Pa mitiga e impacto aki Gabinete AVP-FUTURO ta pone 12,5 miyon florin pa yuda mitiga e desaroyo internacional di prijs di gasolin y diesel y asina yuda absorba parcialmente e impacto negativo di guera riba nos economia segun mi minister Geoffrey Wever.
