Gobierno di Aruba ta haci un yamado na comunidad pa uza antibiotico di manera responsabel, pa evita cu bacteria desaroya resistencia contra medicina. E fenomeno aki, conoci como resistencia antimicrobiano, ta un problema di salud publico cu por haci infeccion comun mas dificil di trata y, den algun caso, hasta imposibel di cura.
E yamado ta relaciona cu Siman Mundial di Conscientisacion tocante Resistencia Antimicrobiano, cu ta tuma luga di 18 te cu 24 di november. Durante e siman aki, atencion ta wordo dedica na e importancia di uzo corecto di antibiotico y otro medicina cu ta combati infeccion.
Resistencia antimicrobiano ta surgi ora microorganismo, manera bacteria, virus, fungus y parasita, ta cambia cu tempo y no ta reacciona mas riba e medicina cu normalmente ta combati nan. Como consecuencia, tratamento cu anteriormente tabata efectivo por perde su efectividad.
Esaki ta nifica cu un infeccion cu antes por a wordo trata facilmente, den futuro por bira un problema serio. E situacion por aumenta riesgo di enfermedad grave y propagacion di infeccion den comunidad.
Un di e problemanan principal ta uzo innecesario of incorecto di antibiotico. Gobierno ta enfatisa cu antibiotico ta combati infeccion causa pa bacteria, pero no ta funciona contra virus, manera influenza of griep comun.
Esaki ta nifica cu ora un persona tin griep, antibiotico no ta yuda pa cura e enfermedad. Uzo innecesario di e medicina aki por contribui na desaroyo di bacteria resistente, cu despues ta mas dificil pa combati.
Con comunidad por yuda?
Gobierno ta recomenda pa uza antibiotico solamente ora un dokter a receta esaki. Ta importante pa sigui instruccionnan di dokter tocante dosis y duracion di tratamento, hasta ora cu e persona ta sinti su mes mihor.
Tambe ta importante pa nunca uza antibiotico cu a sobra di un tratamento anterior, ni comparti medicina cu otro persona. Un medicina cu a wordo receta pa un pacient no necesariamente ta apropia pa otro.
Prevencion tambe ta hunga un rol importante. Laba man regularmente, mantene vacunacionnan na dia y prepara cuminda di manera higienico ta medidanan cu por yuda preveni infeccion y reduci necesidad di uza antibiotico.
E tema internacional di e campaña pa 2026 ta “Educate. Advocate. Act now”, cu ta haci un yamado pa educa comunidad, promove uzo responsabel di medicina y tuma accion desde awor.
Meta di e campaña ta pa proteha efectividad di antibiotico y otro medicina antimicrobiano, no solamente pa generacion actual, sino tambe pa generacionnan futuro.
Gobierno ta enfatisa cu cada persona por contribui na e esfuerso aki, door di uza medicina di manera responsabel y tuma medidanan pa preveni infeccion.



