Definitivo: Venezuela no ta habri frontera

Tempo no ta na nos desbentaha

Venezuela ta keda atrae atencion tur dia. Y no solamente di nos como bisiña, sino di henter mundo. Entre tur e regimennan mas repudia, Corea di Norte y Venezuela ta competi pa e premio mayor. Naturalmente e Norcoreanonan ta di otro categoria, trahando diligentemente riba arma nuclear, haciendo resto di mundo nervioso. Di otro banda, Venezuela tin ehercito cu, manera tabata semper den historia di e continente, ta specialisa den reprimi nan mes hendenan, y no ta tanto ekipa pa hiba un guera contra otro pais. Resultado: nan por mata cuanto un ciudadano cu nan kier, pero busca problema cu nan bisiñanan Colombia y Brasil ta otro asunto.

Ta keda dos bisiña cu nan no tin miedo di tin problema cu nan. Uno ta Guyana y e otro ta e islanan Hulandes. No mester straña nos nada si un di a dianan aki surgi un problema na frontera cu Guyana, pasobra den e situacion actual tur cos cu por uza pa kita atencion for di e problemanan interno, ta bonbini. Motibo nan tin, pasobra entre otro Guyana a emiti concesion di exploracion di gas y petroleo den un zona maritimo cu Venezuela ta considera parti di e teritorio cu nan ta reclama como nan patrimonio. E conflicto ta un di e conflictonan clasico di frontera cu ta data di siglo XIX y no ta keda resolvi asina lihe tampoco.

Ta keda e islanan Hulandes pa busca problema cu nan. Un alternativa atractivo pasobra ta trata di teritorio Hulandes, cu ta parti di Union Europeo, cu a adopta sancion contra e regimen. Kico mas placentero cu tin un algo na man pa busca problema y haci fastioso cu ne, mientras cu na final di cuenta e no tin peso den e wega grandi di politica internacional?

Desde un inicio nos ta manteniendo e posicion cu e conflicto cu e republica bisiña a crea, a raiz di e prohibicion di comunicacion maritimo y aereo, no ta un asunto cu ta toca nos na prome luga. Nos ta djis un pieza chikito den un wega hopi mas grandi.  Cu awor ta resulta cu un exponente di gobierno Venezolano, segun cu nos a mira na television Venezolano, ta bisa cu ta Hulanda a tranca e negociacionnan, ta parce nos un paso logico. Mas ainda pasobra na e momento aki hopi hende na e islanan ta pendiente di Venezuela, si acaso nan ta declara cu nan ta di acuerdo cu e texto cu a palabra na mesa y ta habri frontera. A yama nos atencion tambe cu e ministro Venezolano a duna e impresion cu nan por abastece nos cu tur cos, tambe nan ta den construccion aki, entre otro di hotel, pero ya, e Hulandesnan… “Ta nan tin ainda defensa y relacionnan di exterior den nan man.”

Pero si gobierno Venezolano ta kere cu esey ta suficiente pa crea discordia den Reino, nan ta basta ekiboca. Si tabatin palabra duro a cay na mesa, anto nos lo tin gana di sa kico e tabata. Pero nos no ta cuminsa cu sospecha cu nos representantenan a haci mal papel, y mucho menos si esun cu ta papia ta representa e regimen mas malvado di e continente aki. Ademas, nos tin varios siman, casi un luna den e asunto aki, y finalmente, kico ta e daño? Alternativa pa e par di producto cu tabata bin di Venezuela, por haya otro caminda, pero no ta trabao di gobierno, pero ta pa comercio atende. Al fin y al cabo, ta asunto di gana placa cu core riesgo, en corto, comercio.  Y esnan cu di tur manera mester, of ta desea di biaha pa e pais ey, tin vuelo tur dia di varios luga den region, basta nan corda cu ora nan haya nan den problema, tabatin un aviso di gobierno caba cu si bo no tin nada urgente pa haci aya, no bay.

Pero, talvez nos ta perdiendo algo for di bista aki. Kico ta e beneficionan cu Venezuela tin cu e ceramento di frontera? Nan lo tin mayor control riba kico ta sali di nan pais, tanto na producto como hende, na un momento cu e situacion interno ta empeorando dia tras dia? Talvez cu e proximo tres o cuatro  luna lo ta importante pa tin mas tanto control posibel, cu e eleccion pa presidente na april den mente? Pero pakico nan no ta preocupa cu nan frontera cu Colombia anto? O cu Brasil?

Tin algo mas den henter e asunto aki, y esey ta cu posiblemente gobierno Venezolano kier pone presion pa algo cu no ta tanto na bista. Kico e por ta? E por ta e asunto di e refineria, unda keto bay no ta bin un claridad, no solamente pa gobierno, sino pa henter comunidad. Nos a tuma nota di e intencion di nos ministro encarga cu Labor pa pone un fin na trabao ilegal den e refineria, loke ta bon. Pero e pregunta cu keto bay no ta hayando contesta ta, kico ta bay pasa cu e refineria mes?Ta bira tempo pa claridad, teniendo en mente cu un frontera cera no ta suficiente pa pone nos na rudia, pasobra nos no mester nan upgrader.