ORANJESTAD – Dia 19 di mei 2018 a funda e Toastmasters Club Juan Pablo Duarte, un capitulo registra na Toastmasters International bou di e number #6582738. Un grupo di 20 persona a sostene e iniciativa di Winston Tavarez (Fundacion Dominicano) y Mireille Sint Jago (Fundacion Beulah Philips) pa un Toastmasters Club priva, na Spaño y Ingles, ubica na e fundacion dominicano.
Un aña despues, e miembronan di club #6582738, ta contento di a logra e prome aniversario di nan club. Ora cu Fundacion Dominicano Juan Pablo Duarte, pa motibonan imprevisto, no por a acommoda e Toastmasters Club mas, su miembronan a scohe pa sigui na un otro sitio. Algun cambionan den directiva a tuma luga y na november toastmaster Latoya Briggs, un studiante den examenklas na EPB, a haya e confiansa den voto pa lidera e club como presidente.
Apesar di tur a cambionan, e miembronan di e toastmasters club aki a logra brinda su miembronan e oportunidad pa sigui cu e tareanan educativo. Ya caba e club a logra 6 di e 10 metanan educativo pa cu e aña directoral, cual ta caba dia 30 di juni.
Dia 9 di Mei 2019, durante un reunion extraordinario, miembronan a vota democraticamente pa un nomber nobo pa nan club y a scoge e sugerencia di secretaria Reina Renteiras Reyes pa yam’e ‘Sin Limite Toastmasters Club’.
“Dia 19 di mei, nos a celebra no solamente nos prome aniversario, pero tambe cu nos Presidente Latoya Briggs a cumpli su 19 aña. Masha Pabien Presidente Latoya!”
Dia 1 di juli proximo presidente Latoya Briggs lo pasa e liderazgo di Toastmaster Club Sin Limite ora e directiva nobo sinta.
Den nomber di tur miembro, ta invita pueblo di Aruba pa yama of app 690-0099 pa por ta presente na e siguiente reunion di Sin Limite Toastmasters, cual lo tuma luga diahuebs dia 30 di mei proximo di 7:15-9:00pm. Manera e lema di Toastmasters International ta bisa: “Where Leaders Are Made.” Nos miembronan ta dedica y motiva pa yama bo bon bini y hunto nos lo sigui padilanti y sin limite.
