Diaranson ultimo, Prome Minister Evelyn Wever-Croes a reuni cu doñonan di fruteria, cu ta preocupa cu ciere di frontera cu Venezuela. Manera conoci, dia 9 di september ultimo, Gobierno di Aruba a tuma e decision pa mantene frontera cu Venezuela cera y prolonga e ciere te cu dia 10 di december proximo.
Den un comunicado di prensa, Wever-Croes a indica cu e motibo di e decision aki di Gobierno di Aruba ta pasobra e situacion di Venezuela ta sigui hopi serio y tambe Aruba ainda ta den e proceso pa trece e pasonan cu ta necesario pa nos por tin un miho control riba e fluho di persona.
E situacion na Venezuela, Wever-Croes a indica, ta trece hopi preocupacion pa Gobierno. Gobierno ta sigui e desaroyonan y ta convivi cu e situacion dificil cu Venezuela ta enfrentando. Tambe Gobierno ta hopi preocupa pa e efecto cu esaki tin riba nos pais, cu sigur ta hopi grandi, segun e comunicado. Wever-Croes a duna di conoce cu tambe tin e preocupacion di e costo enorme cu e situacion ta trece cune, debi specialmente cu Aruba no por importa fruta y berdura for di Venezuela actualmente, cu e consecuencia cu e prijs pa fruta y berdura ta bira mas caro.
E peticion cu e doñonan di fruteria a trece cerca Prome Minister Wever-Croes ta pa permiti importacion di fruta y berdura solamente un biaha pa siman for di Venezuela y bou condicionnan hopi estricto. E doñonan di fruteria ta garantisa cu prijs di fruta y berdura lo baha considerablemente si trece e productonan aki for di Venezuela.
“Nos lo evalua e peticion aki y lo tene na cuenta tur e beneficionan, pero tambe e riesgonan, cu esaki por trece cune. Pa mi y pa henter Gabinete Wever-Croes, e interes di comunidad ta na prome luga. Henter e tema di Venezuela ta un dilema constante, na unda cu mester busca un balans den kico ta e interes di pueblo y kico ta e riesgonan pa nos comunidad”, Wever-Croes a duna di conoce, na fin di e comunicado di prensa.
