Carousel 2020 ta andando caba pa temporada di carnaval pa tur e scolnan. Varios instancia y fundacion ta bay na e scolnan pa asina duna nan informacion y charla pa conscientisa e muchanan den e topico di awendia manera internet, droga, uzo di alcohol y mas. 

Ruliene Arends, trahado preventivo di FADA (Fundacion Antidroga Aruba) a duna un resumen di cu e carousel ta bayendo bon y ta satisfactorio pa mira e reaccion cu ta haya di tur scol secundario.

For di december nan ta booked, agenda completo, y ta purba di acomoda tur scol cu ainda ta haci peticion pa carousel por bay cerca nan. “Nos ta haci nos esfuerso pa tur scol haya e charla cu ta desea y esey ta bayendo bon cu ainda ta tuma contact.”

Nan ta ripara cu e reaccion ta uno bon, mirando e importancia pa muchanan haya e charlanan aki. E scol ta cuminsa wak e consecuencia di locual ta pasando cu hobennan y ta importante pa nan tuma nota di esaki.

Despues di carnaval, nan lo sigui mira si tin mas peticion di scol cu kier tambe e charla despues di temporada di fiesta. Nan ta pidi pa esnan cu ta keda interesa tuma contacto y lo hinca tur den otro.

Locual ta importante di e scol ta cu nan mes ta haci e peticion di locual nan ta haya necesario, asina nan ta indica cu nan kier pa cierto fundacion of instancia duna charla, nan ta tuma contacto y asina nan ta yega duna informacion, hasta si nan no ta parti di carousel.

Arends ta splica cu tin algun scol tambe ta pidi pa menos fundacion, pa motibo cu e rooster ta hunga un rol. Nan ta acomoda e schedule ‘mas hopi posibel’, otro fundacion cu ta haci peticion cu tambe kier traha hunto cu e carousel.

Nan enfoke ta keda secundario, mirando cu nan ta ripara cu e uzo di alcohol ta ‘grandi y di lamenta’ sinembargo tambe ta haya peticion pa atende scol basico, cu ta e grupo di klas 5 y 6 pa motibo cu nan tambe ta experimenta cu alcohol.

For di aña pasa ta pidiendo caba pero cu tur fundacion tabata ocupa nan no por a haci’e. Nan ta spera awo pa aña 2020 nan por logra pone den tempo caba for di November y asina por acomoda tur scol secundario pa temporada di carnaval.

Arends tambe a comparti cu e tema di Google ta uno cu ta keda bin dilanti. “Tin docente cu ta acerca oficina y puntra nos unda nan por haya un website corecto pa haya informacion of duna muchanan informacion.”

E ta enfatisa cu muchanan constantemente ta busca cosnan riba Youtube of Google, sinembargo no tur ora esaki ta corecto. Anto con ta haya sa cu esaki ta corecto, pa e motibo aki nan tin Telefon pa Hubentud cu ta enfoca riba e tema aki.

Arends ta bisa cu ta hunga un rol grandi pa nan wak algo diferente pa asina nan por tuma nota di unda nan por obtene e informacion corecto. Pero tambe ta bisa ta keda responsabilidad di mayor cu ta duna telefon, tablet of computer.

 

A puntra Arends con mayor por evalua esaki, e ta contesta cu tin varios aña ta papia di esaki. Nan ta pidi pa tur mayor ta mas envolvi den e topico aki. Mirando cu e muchanan mes ta indica cu nan ta haya alcohol na cas, e rol di mayor semper ta keda importante.

“Nos por duna Carousel tur dia, tur fundacion, maestronan por conscientisa tur dia pero mester corda cu e resto di dia, e mucha ta keda den man di mayor of esun responsabel. Nan ta ehempel cu e mucha lo sigui”, Arends a expresa.

Nan ta den plan pa bin cu proyecto grandi na caminda cu un tema importante. Caminda e mayornan mes lo keda involucra sea den tema di alcohol, droga y otro adiccionnan tambe.