Recientemente Minister Chris Romero a bishita plantacion hidroponico Cunucu Fresh.
Cunucu Fresh ta un plantacion hidroponico local cu ta plantando lechuga localmente pa consumo di nos comunidad y turistanan. E plantacion Cunucu Fresh ta situa den bario di Moko y aki Rudolf Arends a habri su portanan, pa e Titular di e cartera di Sector Primario experencia di cerca con ta maneha un plantacion di e magnitud aki.
Sr. Arends a duna Minister un splicacion amplio di nan plantacion, unda cu nan ta produci diferente sorto di lechuga fresco. E lechuganan aki ta di benta na diferente supermercado na nos isla, pero tambe diferente hotel ta inclui Cunucu Fresh su productonan den nan menu.
Minister Romero a keda sumamente impresiona y satisfecho di por a mira di cerca con nos productornan local ta uzando tecnologianan avansa pa por produci fruta y berdura na nos isla.
