Pastoor Jairo Maduro: “Ma dicidi dispidi mi ruman den mi parokia”

Ayera tardi durante e conferencia di prensa di gobierno, Vicario di Aruba, pastoor Andrzej Makowiec a referi cu asunto di entiero den misa ta “keda como algo pendiente.”

E religioso a laga sa cu diabierna pasa, nan tabatin reunion di clero, caminda e sacerdotenan a expresa cu mayoria di e parokia ainda no ta cla pa atende entiero. Ya cu e ta algo compleho si ta tuma luga den misa. E religioso a bisa cu no ta trata solamente di e respons den oracion. Pero tambe di hendenan cu ta bin pa comparti cu otro y condoler. Pastoor Andrzej Makowiec a laga sa cu na su debido tempo nan lo anuncia ki dia por haci entiero completo den misa.

Sinembargo despues di pastoor Andrzej Makowiec su declaracion, algun reaccion a drenta Bon Dia Aruba di comunidad. E tin di haci dicon si excepcion a wordo haci cu pastoor Jairo Maduro, kende si por a realisa entiero di su ruman den misa. Mientras otro hendenan no por haci mesun cos cu nan sernan keri

E matutino aki a tuma contacto cu pastoor Jairo Maduro, kende a lamenta e tipo di insinuacion aki. El a declara cu su famia mester warda casi dos luna pa dera su ser keri cu a fayece na Colombia. Finalmente nan por a trece su resto na Aruba. Maduro ta haya cu e miho luga cu e, hunto cu su famia tabatin pa duna su ultimo ayo na su ruman, tabata den su parokia.

El a pidi pastoor Andrzej Makowiec pa celebra e misa aki cu a tuma luga den un circulo cera di su famia cu presencia di su mama. Te ainda e no a ricibi niun obhecion di obispado pa loke el a haci.