Un aña pasa, riba 13 di januari 2016, minister Benny Sevinger a firma un decreto sin cu e tabatin e autoridad pa haci esaki,  bayendo contra e ley vigente. Sinembargo DTI a cuminsa actua riba esaki den espera cu na januari 2017 tur cos tabata bon regla pa  enforsa mas siguridad na pia di trabou.

Sinembargo e ley nobo cu ta tin un impacto grandi pa tur negoshi na Aruba, no a bin. E ley mes ta uno positivo pa trahadonan, pasobra e ta pone mas condicion pa asina dunado di trabou cumpli cu un miho siguridad na trabou.

E parti di implementacion ta den man di Dienst Technische Inspecties (DTI) cu tambe ta responsabel pe control. Sinembargo e parti di control ta den man priva, esta cu companianan mes mester percura pa nan tin un persona special pa controla si e compania ta cumpli cu e rekisitonan. E inspector di siguridad aki ta obligatorio pa cu compania cu tin mas cu 10 trahado.

Manera menciona minister Sevinger a firma un decreto pa asina DTI por cuminsa cu e trabou caba, anticipando riba e ley cu mester a drenta na vigor 1 di januari 2017. Bon Dia Aruba ya a skirbi aña pasa cu e decreto aki tabata ilicito como cu minister a asumi cierto autoridad cu e ley vigente no ta dun’e. E intencion tabata pa DTI cuminsa controla companianan na Aruba entrante di 1 di juli sinembargo esaki no a sosode, momento cu e señal a drenta cu e decreto ilegal e ambtenaarnan di DTI no por drenta companianan priva.

Ora nos a busca comentario cerca DTI puntrando si esaki ta haci cu e proyecto a tranca, e director Dominico Werleman a indica, cu nan ta bay controla cierto compania, mas tanto grandi y por ehempel hotel, cu kier coopera boluntariamente. Sr. Werleman tambe a bisa cu e no ta straña cu gobierno kier implementa a base di un decreto, en bes di warda riba e ley y tampoco cu den e decreto tin cosnan pone cu no ta cuadra. El a bisa cu e tempo ey cu lo tene cuenta cu esaki pero cu pronto e ley nobo ta bay bin toch y asina e asunto lo wordo drecha.


Sinembargo e aña nobo a cuminsa y no a tende nada mas di e ley di siguridad. Parlamento tampoco a trata esaki ainda. Pero di otro banda e decreto ilegal si ta keda vigente, como cu e minister no a hala esaki aden.

Parti ilegal
Dicon e decreto cual e minister a firma, ta ilegal? Bon Dia Aruba a analisa e ley esta e Veiligheidsverordening. E decreto ta basa su mes riba articulo 3 di e ley aki. Sinembargo e articulo aki no ta duna niun autorisacion na minister Sevinger pa bin cu reglanan nobo di siguridad. Cu e decreto e minister ta cambia un ley, cual ta contra e procedura di ley hancra den nos constitucion. Pa cambia e ley di Veiligheidsverordening, e unico instancia cu por tin e autoridad, ta parlamento.

Un otro punto den e decreto cu no ta cuadra, ta e punto cu e minister ta menciona e codigo civil. Sinembargo e codigo civil no por duna minister/gobierno autoridad.