Ministerio Publico a confirma cu ta buscando Milanchelo Trenidad (30) como e sospechoso di e tiramento di e 2 bouncer di Olde Molen diadomingo marduga. Vocero Ann Angela a informa tambe cu a tene 3 entrada hudicial pariba di brug awe, buscando e unico sospechoso te awor den e caso. Ainda no a logra pone man riba Trenidad cu ta bibando na San Nicolas.
Update: Polis a publica e informacion aki bou. Pues ta buscando Milanchelo Trenidad, miho conoci como Yellow. (y no Yellowman manera Bon Dia a publica prome a base di informacion disponibel)
COMUNICADO IMPORTANTE :
Ta considera e sospechoso como hopi peligroso
Polis ta buscando e sospechoso “Yellow”
Ta aprecia tip di comunidad riba su paradero
Relaciona cu e caso di asesinato y tiramento cu a sosode dialuna marduga dia 7 di december ultimo, Cuerpo Policial Aruba ta solicita ayudo di comunidad pa detencion di e sospechoso principal den e caso aki. Riba ordo di Ministerio Publico ta buscando e homber Milanchelo Nelson Antonio Trenidad, alias “Yellow”. E ta naci na Boneiro dia 7 di mei 1985 y ta biba na Cayenastraat # 20 na Aruba. Ta acusa e sospechoso aki di e viola articulo 2:262 c.q. 2:259 di e “Wetboek van Strafrecht van Aruba” y articulo 3 di e “Vuurwapenverordening”. Polis ta pidi comunidad, cualkier persona cu por sa algo di su paradero, pa informa Polis mesora yamando number # 100 of via tipline 11141. Ta considera e homber aki como peligroso y cu chens grandi cu e ta arma.
