Gobierno di Aruba, hunto cu diferente instancia manera Departamento di Naturalesa y Medio Ambiente (DNM), Bureau City Inspector, Dienst Openbare Werken (DOW) y Cuerpo Policial Aruba, a organisa un encuentro cu prensa na e ex edificio di Music Box den Elleboogstraat pa comparti progreso y siguiente pasonan den e revitalisacion di centro di Oranjestad.

E iniciativa aki ta basa riba e establecimento oficial di un taskforce interministerial bou e titulo “Convivencia: Centronan di Ciudad Sigur y Humano”, crea pa medio di un ministeriële beschikking como parti di e implementacion di politica di gobierno pa 2025–2028.

E taskforce tin como obhetivo principal desaroya y ehecuta un strategia integral pa fortalece siguridad, convivencia, calidad turistico y habitabel den centro di Oranjestad y San Nicolas. Entre su responsabilidadnan tin coordinacion di accionnan social, preventivo y di siguridad, manera tambe desaroyo di un plan di accion pa periodo 2025–2027.

Como parti di e structura formal, a nombra e siguiente miembronan di e Taskforce:

Ramon Arnhem ( asigna pa Ministerio di Asuntonan General )

Mauro de Koning ( asigna pa Ministerio di Finansa )

Gerald Vingal ( asigna pa Ministerio di Husticia )

Jose Paula ( asigna pa Ministerio di Infrastructura )

Noreen Vingerhoedt ( asigna pa Ministerio di Asuntonan Social )

Nicole Lugo ( asigna pa Ministerio di Turismo )

E miembronan ta representa diferente ministerio clave, sigurando un enfoke interministerial y coordina pa atende retonan di siguridad, convivencia y desaroyo urbano.

Ademas, e Taskforce tin e posibilidad pa traha hunto cu partnernan externo manera organisacionnan social, sector priva y stakeholdernan turistico, pa asina logra un enfoke integral y sostenibel.

Korpschef Ramon Arnhem a haci un apelacion directo na comunidad pa enfrenta hunto e reto di calidad di bida den centro di Oranjestad. Durante su declaracion, Arnhem a destaca cu e problematica actual no ta uno individual, sino un reto comparti cu ta rekeri accion conhunto entre gobierno, institucionnan y comunidad. “Nos tin un problema conhuntamente, y mi ta pidi boso awe pa un yudansa pa trata e problema aki hunto,” Arnhem a expresa.

Segun e Korpschef, e situacion actual den centro di e ciudad ta caracterisa pa varios factor cu ta influi negativamente riba calidad di bida. Entre esakinan, el a menciona falta di limpiesa, edificionan bandona den mal estado y presencia di persona vulnerabel sin un luga fiho pa keda, loke ta crea preocupacion tanto riba siguridad como riba e imagen di Oranjestad.

Arnhem a subraya cu e diferente retonan aki no ta existi separa, sino cu nan ta fortalece otro, afectando no solamente e experiencia di bishitantenan, pero mas importante ainda, e bienestar di residentenan. “E ta molestia nos como ciudadano. Nos cu ta biba aki y cu ta contribui na construi Aruba, no merece esaki,” Arnhem a indica.

E Korpschef a enfatisa cu e impacto ta bira ainda mas relevante mirando cu economia di Aruba ta depende den gran parti riba turismo, pero cu e prioridad principal ta e calidad di bida di su propio pueblo.

Como respuesta, a lanta un enfoke multidisciplinario bao e Taskforce nobo, cu ta integra diferente ministerio y instancia relevante pa atende e problematica di forma structural.

Entre e accionnan concreto cu lo implementa, tin:

Mas limpiesa y mantencion di cayanan

Fortalecemento di vigilancia y presencia den centro

Retiro di autonan bandona y situacionnan peligroso

Atencion y orientacion pa persona vulnerabel

Arnhem a finalisa cu un yamado fuerte pa participacion di comunidad: “Comunidad di Aruba, ban desde awe conhuntamente haci nos isla mas limpi y mas sigur. Ban hasie.”