(NLTimes) – Autoridadnan Hulandes a aresta un homber di 29 aña na Amsterdam bao sospecha cu el a crea e servicio di criptomoneda Etherium Tornado Cash.

Ta sospecha cu e homber en cuestion a sconde fluho di placa y a facilita labamento di placa segun loke FIOD, belastingdienst su departamento di investigacion a bisa riba diabierna.

Tornado Cash ta un servicio pa mix criptomoneda, haciendo cu ta bira mas dificil pa yega na e fondo su fuente original. Segun FIOD, personanan ta haci uso di servicionan aki pa aumenta nan anonimidad, y e servicionan aki no ta controla e origen, cual tin biaha ta criminal, di e criptomonedanan cu nan ta mix.

FIOD y Financial Advanced Cyber Team (FACT) a lansa nan investigacion contra Tornado Cash den juni. “FACT ta sospecha cu Tornado Cash ta ser usa pa sconde fluhonan grandi di placa, incluyendo robonan di criptomoneda manera hack y estafa. Esaki tambe ta inclui fondonan cu a ser adkiri pa medio di hacknan di gruponan asocia cu Noord Korea,” FIOD a splica.

Segun FIOD, Tornado Cash a logra un ganashi di por lo menos 7 biyon dollar desde cu nan a habri den aña 2019. “Investigacionnan a demostra cu por lo menos un biyon dollar di criptomoneda illegal a pasa door di e mixer aki. E ta sospecha cu e personanan tras di e organisacion a crea ganashi inmenso di e transacionnan aki.”

Merca a pone Tornado Cash riba nan lista di sancion riba dialuna dia 8 di augustus. E investigacion te ainda ta andando y posiblemente lo haci mas aresto den futuro.

LEAVE A REPLY

Please enter your comment!
Please enter your name here