Ex-presidente di Ecuador, Rafael Correa, a bay huicio na Corte Nacional di Husticia di Ecuador desde ayera dialuna, pa motibo di acusacion di fraude financiero durante su campaña y pa acepta miyones di dollar di soborno.
Correa, di 56 aña, presidente durante un decada te cu 2017, y otro 20 persona acusa, como tambe ex-vicepresidente Jorge Glas, secretario huridico di presidencia Alexis Mera y ex-minister di Transporte y Obra Publico, Maria de los Angeles Duarte, lo mester presenta na Corte Nacional den un huicio cu ta premira cu lo por duna varios siman. Un apelacion di e veredicto por extende te fin di aña 2020.
E ex-mandatario, cu ta husga den su ausencia ya cu e ta biba na Belgica cu su casa, ta insisti cu e huicio ta un caceria di bruha cu ta pretende pone fin pa su carera politico prome cu e eleccionnan di otro aña. Correa, cu ta impedi pa su postulacion pa presidencia debi na limite di plaso, igualmente lo por postula su mes pa legislado den eleccionnan nacional di februari 2021, loke por dun’e fuero parlamentario pa no bay huicio, si e campaña cuminsa prome cu e huicio.
Simannan despues cu a desaroya e protestanan violento riba caya pa via di medida di austeridad na october, e sucesor di Correa, e presidente Lenin Moreno, ta enfrenta dificultadnan pa trankilisa e inversionistanan nervioso di bono y e Fondo Monetario Internacional, despues cu su indice di encuesta a yega na 20% di aprobacion. Un regreso di e ex-presidente, cu a hiba e pais pa no cumpli cu e bononan na un balor di 3.200 miyon dollar na 2008, lo por altera hopi e politica di e nacion.
