Alcalde di Bogotá, Claudia López ayera dialuna a duna di conoce cu e prome pashent infecta cu coronavirus na e ciudad a logra cura di e enfermedad.
“A haci e test un biaha mas y awe nos por anuncia cu e prome caso di coronavirus na Bogota ya no tin e enfermedad” Lopez a sigura.
Di acuerdo cu e alcalde, e hoben a cura pa via cu nan a logra di detecta e virus di manera trempan cu un prueba cu a practica, e pashent a keda den aislamento y a sigui e recomendacionnan di cuida su mes.
“E prueba a ser practica e dia 6 di maart y a cuminsa cu e tratamento enfoca den aislamento principalmente. Diasabra ultimo a realisa otro prueba y a keda confirma cu el a supera e enfermedad”, el a señala.
E hoben aki a yega for di Milan (Italia) unda e tabata studia. Despues di a keda confirma como positivo pa coronavirus, e hoben a keda den aislamento total. Danki na tur e medidanan di precaucion, e no a contagia ningun miembro di su famia.
“Como cu a tuma medida den e caso, e no a contagia ni su mama ni e señora cu ta traha na su cas”, Claudia Lopez a sigura.
