Ayera merdia Cuerpo Policial di Aruba a informa tocante un investigacion grandi cu tin pa loke ta trata importacion y benta di droga na Aruba e cual a duna como resultado, te cu awor, e detencion di 3 persona stranhero.
Unit Narcotica ta bin trahando duro riba diferente caso, desde luna di november Unit Narcotica ta investigando un caso grandi di droga cu ta trata di un grupo criminal cu ta importa y bende droga na Aruba.
Durante e investigacion Unit Narcotica a detene diferente sospechosonan.
E sospechosonan ta: un homber di inicial J.E.M. naci na Republica Dominicana 28 aña di edad, un hende muhe di inicial J.M.M.M naci na Republica Dominicana di 29 aña di edad y tambe a detene e homber di inicial M.L.S. naci na Merca di 67 aña di edad como sospechoso den e caso menciona aki.
Durante e investigacion a haci dos entrada hudicial, unda a haya y a confisca un cantidad di placa como tambe diferente tipo di droga.
Cuerpo Policial a indica cu e caso grandi aki keto bay ta den pleno investigacion y nan no ta descarta cu lo tin mas detencion den e dianan nos dilanti.
