(AP) – Environmental Protection Agency ta advertiendo residentenan cu ta biba rond di un planta di sterilisacion di ekiponan medico den 13 estado y Puerto Rico tocante riesgonan di salud potencial di e emision di ethylene oxide, cual ta un kimico usa regularmente den nan operacionnan.

Laredo, Texas, Ardmore, Oklahoma y Lakewood, Colorado ta entre e comunidadnan cu ta enfrentando e riesgo mas halto di emision di ethylene oxide, EPA a bisa.

E agencia a notifica 23 sterilisador comercial, 19 den Merca continental y 4 den Puerto Rico, cu nan operacion ta treciendo un riesgo eleva di cancer y otro malesanan. E advertencia ta bini despues di un encuesta recien tocante emision di casi 100 sterilisador nacionalmente.

Ethylene oxide ta usa pa limpia tur ekipo medico y te hasta e batanan di cirugia.

Mientras cu den termino corto, e kimico no ta posee un riesgo na salud, EPA a bisa cu exposicion di termino largo of pa henter bida si ta causa un gran variedad di impacto den salud, incluyendo Lymphoma y Cancer di pecho. EPA a bisa cu nan ta trahando cu e sterilisadornan comercial pa tuma e medidanan apropia pa reduci nan emision.

“Awe, EPA ta tumando accion pa sigura cu e comunidadnan ta informa di nos esfuersonan pa trata cu e kimico aki, cual ta un toxina potente den e aire cu ta trece riesgonan di salud serio na largo plaso,” Administrador di EPA Michael Regan a bisa den un declaracion riba diaranson.

EPA lo crea campana pa yega na e publico di cada un di e comunidadnan aki unda e riesgo ta eleva, incluyendo un seminario online, tambe yama ‘webinar’, riba dia 10 di augustus. Mas di mita di e sitionan riba EPA su lista di vigilancia ta dominantemente comunidadnan di entrada baho of di minoria.

LEAVE A REPLY

Please enter your comment!
Please enter your name here