Aruba su sector di Turismo ta sigui mustra un prestacion fuerte durante e prome mita di 2025, segun e rapportnan mensual di Aruba Tourism Autority (ATA) di januari pa juli 2025. A pesar di fluctuacionnan den biahamento global, Aruba a registra en general un crecemento saludable di entrada di turista, un fortalecemento den diversificacion regional y un aumento den gasto di turistanan.

Entre januari y juli 2025, Aruba a ricibi 762.356 bishitante, marcando un aumento di 3,3% compara cu e mesun periodo den 2024. Den total, turistanan a pasa 5,1 miyon anochi riba nos isla. Compara cu den 2024, esaki ta un aumento di 0,5%. Gastamento tambe a subi pa un promedio di 5.258,50 biyon marcando un aumento di 12,3% compara cu aña pasa, segun cifranan for di Banco Central di Aruba (CBA). Un cambio den accounting, esta e inclusion di tarifanan di mantencion pa timeshare cu ta cay bao “Servicionan di Biahe”, tambe ta engrandece e base di ganashi den e sector.

Continente Americano ta keda un mercado clave
Manera e rapportnan ta indica, Merca ta keda Aruba su mercado mas grandi den Turismo, contando pa mas cu 74% di bishitantenan total. Durante e prome mita di aña, yegadanan di turista Mericano a crece cu 0,7%, mayoria di nan for di New York, Massachusetts, y New Jersey, mientras cu a mira un aumento di 28% den bishitantenan di Texas y 14% di California. E totalidad di bishitantenan Canades tambe a aumenta cu 7,7%, indicando un prestacion fuerte den e mercado Norte Americano.

Notablemente, turismo di Sur America a mira un aumento fuerte di 20,7% compara cu aña pasa. Brasil y Argentina a sobresali mas, unda a registra un aumento di 86 y 95%, respectivamente. Esaki ta refleha un confiansa renoba den biaheronan, un mas biahamento aereo den e region. Uruguay y Paraguay tambe a registra crecemento di dos cifra, señalando un momentum positivo den e continente sur.

Cambio den preferencia di acomodacion
E aña aki tambe a mira un cambio significante den preferencia di estadia, unda bishitantenan ta prefera mas pa estadianan independiente manera Airbnb. Estadia di camber solamente, conoci como acomodacionnan estilo European Plan (EP) a crece 3,8%. Mientras tanto, estadia den resortnan all-inclusive a cay cu 5,4% y Timeshare tambe a mira un caida di 2,1%. Otro tipo di acomodacion, entre otro villa, vacation rental y boutique hotels, a crece cu 11,2%, representando un promedio di 38% di estadianan pa anochi. Esaki ta sugeri cu bishitantenan ta keda busca flexibilidad y un experencia mas local en bes di keda den resortnan cu ta ofrece un pakete completo.

A pesar di un motibo prometedor tras di e crecemento, AHATA a bati alarma recien cu e trend di estadia den vacation rentals por causa mas daño cu beneficio. Aunke a mira un crecemento den cantidad di turista bishitando e isla y mas construccion di hotel den e periodo di 2018 pa 2024, no a mira e mesun crecemento aki di estadia den hotel. Den 2025 por mira un impulso similar tumando lugar notando cu estadia den vacation STVR a redobla ora midi contra liñanan di base pre-pandemia (2018) pa e prome mitar di aña, mientras cu estadia mas hotel a crece mas suavemente.

E cifranan mas recien di AHATA ta mustra cu ocupacion averahe a baha te 63% na september, 10% menos cu un aña pasa. Aunke cu september historicamente tin un dip y a logra mantene RevPAR, e organisacion a enfatisa cu e cifra aki ta preocupante.

E falta di regulacion ta causa daño directo na ciudadanonan. E tempo ey caba e sector di vivienda tabata mirando un scarsedad enorme, y te ainda esaki ta e caso. Un gran cantidad di ciudadano riba e isla ta kedando sin e oportunidad di huur of cumpra un cas propio, y esaki ta un situacion prevalente specialmente den e generacion mas hoben cu ta yegando un edad mas adulto.

Biahamento aereo ta crece, pero crucero ta cay
Aruba su conectividad a keda robusto durante e prome mita di 2025. Algun aerolinea Mericano a mira un expansion den nan servicio, mientras cu otronan a registra un caida chikito. Aerolinea Copa Airlines, por ehempel, a yuda carga e yegadanan adicional for di e continente di Sur America, mientras cu pasashinan mas barata a contribui na e diversificacion di mercado. Sinembargo, e sector di crucero ta enfrentando un caida di corto plaso.

Segun e rapportnan ta indica, e aña aki a mira un total di 514.580 pasahero di crucero, cual ta un caida di 5.3% compara cu e mesun periodo den 2024. Analistanan di e industria ta atribui e caida aki na redespliegue temporal di barconan y ahustamento na programacion di cruceronan, en bes di un caida significante den balor. A pronostica cu e temporada di 2025-2026 lo keda positivo toch.

Mirando e resultadonan aki den e ultimo seis lunanan, unda por a registra un base turistico mas diverso, un aumento den biahamento aereo, Aruba ta bon posicion pa continuo crecemento pa e segunda mita di aña. De hecho, e rapport mensual di luna di augustus ta refleha e crecemento gradual aki, unda cifranan ta indica un aumento di 13% den bishitante y 14% den totalidad di estadia pa anochi compara cu juli. Porcentahe den gastamento di placa tambe a keda halto. Esaki ta refleha tambe un aumento saludable den temporada di zomer.

Esfuersonan pa promove sostenibilidad, experencianan local y hospitalidad autentico ta den cuadra cu trendnan di biahe global, sigurando Aruba su posicion como “One Happy Island” pa bishitantenan rond mundo.