6augNG UNOCA (13).jpg

Nos ta drentando e ultimo siman di vakantie escolar y UNOCA, e fundacion cu ta stimula arte y cultura na Aruba, ta manda invitacion na tur mayor pa inscribi mucha y hoben di 6 pa 17 aña den e Summer Camp orguyo crioyo, un programa educativo conectando hoben den arte y cultura. E ta un camp di Musica, Baile y Teatro, cu lo stimula creatividad den nos hobennan. Por registra door di manda un e-mail na cc@mobiscommunity.org of yama 5659600.  E Camp lo tuma luga di 8 pa 12 di augustus di 9am pa 5pm na Centro di Bario Brazil y Centro di Bario Ayo y ta wordo organisa pa Chispa Creativo, un iniciativa di Stichting Mobis y haci posibel cu subsidio di UNOCA.

Esaki ta un di 3 camp vacacional pa mucha cu enfasis riba plataformanan cultural y artistico cu ta wordo subsidia pa UNOCA den e temporada di vakantie. Door di aporta na iniciativanan asina ta expone muchanan y hoben na diferente formanan di expresion y ta haci arte y cultura di Aruba accesibel na e grupo mas hoben di nos sociedad. Trahando, colaborando y siñando di artistanan y docentenan nos hobennan ta wordo inspira y ta cultiva den nan e amor y balor pa arte y cultura en general.

 

Otro di e campnan subsidia pa UNOCA ta e Beam Summer Camp, un proyecto pa muchanan di 6 pa 11 aña cu a tuma luga di 25 pa 29 di juli cu colaboracion di artistanan local manera Jess Wolf, Romelinda Maldonado, Beach De Lamere, Noemi Geerman, Velvet Zoe Ramos. Nan ta preparando pa un bunita exposicion dia 5 di augustus pa 6:30pm na BEAM. Henter comunidad ta invita pa bin apoya nos muchanan. Nan a disfruta, nan imaginacion a wordo inspira y awor nan kier comparti cu henter Aruba kico nan a siña y crea durante e proyecto.

Tin hopi beneficio ora ta expone muchanan na arte y otro formanan artistico. Desaroyo di “Motor Skills” cu ta wordo practica den e proceso di crea arte, manera corta, pinta cu un crayon of verf cu cuashi ta movecionnan esencial
cu ta aporta na e crecemento y desaroyo di “Fine Motor Skills” den muchanan.  Arte tambe ta aporta na desaroyo di lenguahe: Ora un mucha ta crea arte of ta papia di dje e tin oportunidadnan pa siña palabranan nobo, colornan, formanan of accionnan.

 

Segun un estudio di “Americans for the Arts” na Merca, educacion artistico ta reforsa nos habilidadnan pa resolve problemanan y pensa critico. E experiencia di haci decisionnan den e proceso di crea arte ta extende na otro parti di bida. Si muchanan ta explora, pensa, experimenta y purba ideanan nobo, nan creatividad tin e oportunidad di florece.

 

Pa mas informacion di proyectonan cultural por bishita Unoca Aruba riba Facebook of @unoca riba Instagram.