Recientemente, Bon Dia Aruba a ricibi informacion cu tin algun ciudadano a haya boet di polis pa motibo di no tin comprobante di pago di number di auto. Esaki a pesar cu Departamento di Impuesto no a logra manda tur persona cu si a paga nan comprobante.

Diferente ciudadano cu a combersa cu Bon Dia Aruba a expresa preocupacion despues di a mira informacion comparti riba rednan social, indicando cu polis ta parti boet pa motibo di no tin nan recibo di DIMP pa pago di impuesto di vehiculo di motor.

Riba rednan social, usuario di inicial Y.F. a bisa cu polis a par’e pa control, y el a mustra comprobante di pago. Sinembargo, polis a bisa “no bo ta haya boet pa esey mester tin recibo,” segun e usuario.

Esaki sigur a crea hopi preocupacion entre comunidad. “Mi a paga na tempo y a upload tur cos riba website di DIMP,” un persona a bisa. “Pero ainda mi no a haya e recibo. Con mi por haya boet si ami si a cumpli?” un ciudadano preocupa a expresa.

Polis “por wak den e sistema”

Bon Dia Aruba a acerca hefe di comunicacion di polis, Sra. Liliana Rasmijn, pa puntra si ta asina cu polis ta duna multa na ciudadanonan cu no a ricibi nan recibo for di DIMP.

“Mi no por bisa cu siguransa cu polis lo a duna boet pa no tin e comprobante di pago di DIMP,” Rasmijn a bisa. Segun Rasmijn a indica, no ta asina cu necesariamente polis lo duna un boet den e casonan specifico aki.

“Si e persona por mustra e pago online e lo por yuda tanten,” Rasmijn a indica.

Sinembargo, mas importante ta e hecho cu Central di Polis tin acceso na e informacion di pago, y pues por verifica si e persona en cuestion a paga of no.

“Central di Polis tin update regular di DIMP na unda por wak si e number ta paga en berdad,” el a splica. “Dus [e persona] cu a post por a bay DIMP y bisa nan cu e no a haya su recibo. Mi no por bisa cu siguransa cu polis lo a duna boet pa no tin comprobante di pago di DIMP, pasobra nos por wak den e sistema,” Rasmijn a bisa. “Si den sistema e pago di number no ta paga, e ora si polis lo a duna boet pa no tine paga.”

Den e caso specifico aki, si e persona por proba cu si a paga, e ora e no lo mester haya un boet.

DIMP procesando 300 pa 500 peticion pa dia

Bon Dia Aruba tambe a acerca managing director di DIMP, Sra. Luenne Gomez Pieters, pa puntra tocante e atraso den entrega di recibo pa clientenan cu a paga nan number di auto na tempo.

Gomez Pieters a confirma cu ainda tin hende pendiente di haya nan recibo, pero cu ta trahando duro riba esaki, procesando entre 300 pa 500 peticion cada dia.

“Nos a ricibi 14.036 peticion y a procesa 6.346,” el a conta. “Locual cu ta pendiente ta wordo trata den un norma di trabao di 300 pa 500 peticion pa dia.”

Asina ta cu ta spera cu “pa fin di april lo keda cla cu e peticionnan cu ta pendiente.”