Ayera mainta, miembronan di Aduana di Aruba a tene un accion di protesta na aeropuerto. Segun minister Geoffrey Wever (Futuro) a informa riba su cuenta di Facebook, e trahadornan a pone trabao plat pa motibo di malcontento cu instalacion di camara di seguridad na e aeropuerto.
Den e publicacion di minister Wever ta indica cu Gerencia di Departamento di Aduana ta lamenta e walk-out cu a sucede ayera mainta na aeropuerto Reina Beatrix. Nan a informa cu e accion aki tabata relaciona cu e instalacion di un camara di seguridad den e area di inspeccion/control di Aduana cu ta situa den e sala di yegada.
“Nos ta compronde e preocupacionnan di nos empleadonan encuanto e instalacion di e camara y ta percura pa nan por eherce nan trabao na e maximo di nan potencial,” e comunicado ta indica. “Pa ser exacto, e camara a ser instala bao peticion y aprobacion di Aduana, teniendo na cuenta tur procedemento y maneho di aeropuerto Reina Beatrix.”
E camara ta hunga un rol crucial den fortalecemento di seguridad y proteccion den e sala di yegada. Ademas, e camara por capta peligernan potencial y detecta iregularidadnan como tambe colecta data relevante cu ta yuda den un maneho eficaz di operacionnan diario di Aduana. Eventualmente e paso pa instalacion di e camara ta pa fortalece e confiansa publico y mantene integridad den nos servicio.
Gerencia di Aduana ta sigura cu e procedemento di instalacion di camara no ta bay afecta e derecho di privacidad di ningun pasahero y ta sigui dedica na mantene un ambiente laboral sigur, placentero y confiabel pa tur nos empleadonan como tambe biaheronan y stakeholders.
